ISAMBULO 5 - IsiNdebele 2012 Translation

Umsongo neMvana

¹ Nje-ke ngabona umsongo ngesidleni saloyo ohlezi esihlalweni sobukhosi utlolwe ngaphakathi nangaphandle, unanyathiselwe amaphawu alikhomba.

² Ngabese ngibona ingilozi enamandla imemezela ngelizwi elikhulu ithi: “Ngubani ofanele ukunamulula amaphawu alikhomba abe avule umsongo na?”

³ Bekungekho namunye ezulwini, ephasini nangaphasi kwephasi owaba namandla wokusongulula umsongo alunguze ngaphakathi kwawo.

⁴ Ngadinda isililo ngombana bekunganamuntu ongasongulula umsongo alunguze ngaphakathi kwawo.

⁵ Yeke omunye wabaphathi wathi kimi: “Ungalili! Qala, iNgwenyama yekoro yakwaJuda emurabhu kaDavida ihlulile kobana ikwazi ukunamulula umsongo namaphawu wawo alikhomba.”

⁶ Nje-ke ngabona iMvana ijame kwanga ihlatjiwe, iphakathi kwesihlalo sobukhosi naphakathi kwezinye iimbunjwa eziphilako kanye nahlangana nabaphathi. Beyineempondo ezilikhomba namehlo alikhomba okumimoya elikhomba yakaZimu ethunyelwe kilo loke iphasi.

⁷ Yaya yawuthatha umsongo esidleni saloyo ogade ahlezi esihlalweni sobukhosi.

⁸ Kuthe bona iwuthathe, iimbunjwa ezine eziphilako nabaphathi abamatjhumi amabili nane baguqa phambi kweMvana, omunye nomunye aphethe iharibha nezitja zegolide zizele itjhwalo, okumithandazo yabacwengileko.

⁹ Zavuma irhubo elitjha zathi: “Ufanele wena ukuthatha umsongo, unamulule amaphawu ngombana gade uhlatjiwe, ngeengazi zakho wahlengela uZimu abacwengileko abavela kenye nenye ikoro, ilimi, abantu nesizwe,

¹⁰ wabenza umbuso, baba baphristi bokulotjha uZimethu, begodu bazakubusa ephasini.”

¹¹ Nje-ke ngaqala, ngezwa ilizwi leengilozi ezinengi zizombe isihlalo sobukhosi, iindalwa ezine eziphilako nabaphathi. Bekuziingidigidi neenkulungwana ngeenkulungwana,

¹² zirhuba ngelizwi elikhulu zithi: “Ikufanele iMvana eyahlatjwako ukwamukela amandla nomnono, ukuhlakanipha nobukhosi, idumo, iphazimulo nokubatjazwa!”

¹³ Yeke ngezwa zoke iimbunjwa ezulwini nephasini, iye, nezingaphasi kwephasi nangelwandle, ngitjho nakho koke okukikho kukhalela kusithi: “Kiloyo ohlezi esihlalweni sobukhosi nakiyo iMvana akube lidumo, iphazimulo namandla ngokungapheliko nini nanini.”

¹⁴ Iimbunjwa ezine eziphilako zathi: “Amen,” nabaphathi bawa phasi, balotjha.