ISAMBULO 3 - IsiNdebele 2012 Translation

Umlayezo eSardisi

¹ “Kiyo ingilozi yebandla leSardisi tlola uthi: Naka amezwi waloyo ophethe imimoya elikhomba yakaZimu kanye neenkwekwezi ezilikhomba, uthi ngiyayazi imisebenzakho begodu udume ngelokuthi uyaphila kanti ufile.

² Yeke, vuka uqinise lokho okuseleko nobekusele kuzokufa ngombana ngifunyene imisebenzakho ingakapheleli phambi kwakaZimami.

³ Nje-ke khumbula lokho okwamukeleko wakuzwa; kulalele uphenduke. Kodwana nawungaphaphamiko, ngizokukhokhobela njengesela, angekhe wazi bona ngizokufika kuwe ngasiphi isikhathi.

⁴ Nokho kusesekhona abantu abambalwa eSardisi abangakasilaphazi izambatho zabo; bazokukhamba nami bembethe ezimhlophe ngombana bafanele.

⁵ Ngokunjalo nohlulako uzokwembathiswa ezimhlophe, ibizo lakhe angekhe ngalesula encwadini yabaphilako; ngizolivuma phambi kwakaBaba naphambi kweengilozi zakhe.

⁶ “Onendlebe akezwe lokho uMoya akutjhoko emabandleni.”

Umlayezo eFiladelfiya

⁷ “Kiyo ingilozi yebandla leFiladelfiya tlola uthi, Naka amezwi waloyo ocwengileko noqinisileko, loyo ophethe isihluthulelo sakaDavida, ovula kungavali muntu, avale kungavuli muntu, uthi:

⁸ Ngiyayazi imisebenzakho. Qala, ngibeke phambi kwakho umnyango ovulekileko nongekhe wavalwa mumuntu. Ngiyazi bonyana unamandla amancani, nokho amezwami uwalondile nebizo lami akhange uliphike.

⁹ Labo abalisinagogi lakaSathana, abathi bamaJuda khisibe abasiwo kodwana baleya amanga, ngizobenza beze bazokuguqa eenyaweni zakho bebalemuke bonyana ngikuthandile wena.

¹⁰ Njengombana uwulondile umyalo wami wokunyamezela ngesineke, nami-ke ngizokuhlenga nakufika isikhathi sokulingwa esizokwehlela loke ilizwe kobana kuzizinywe abakhileko ephasini.

¹¹ Ngiyeza masinyana; londa lokho onakho ukuze kungabikhona okwemuka isihlohlo sakho.

¹² Ohlulako ngizomenza isika ethempelini lakaZimami; angeze asasuka kilo. Ngizokutlola kuye ibizo lakaZimami nebizo lomuzi kaZimami, iJerusalema elitjha eliyokwehla livela kuZimami ezulwini. Iye, ngitlole phezu kwakhe nebizo lami elitjha.

¹³ “Onendlebe akezwe lokho uMoya akutjhoko emabandleni.”

Umlayezo eLawodikeya

¹⁴ “Kiyo ingilozi yebandla leLawodikhiya tlola uthi: Naka amezwi ka-Amen, ufakazi othembekileko noqinisileko, osisusa salokho okubunjwe nguZimu, uthi:

¹⁵ Ngiyayazi imisebenzakho nokobana awuqandi, awutjhisi. Bengifisa bona ngathana bewungoqandako namkha otjhisako.

¹⁶ Alo, njengombana ubuthuku nje, ungatjhisi ungaqandi, ngizokukhafula.

¹⁷ Wena uthi, ‘Nginjingile, ngizibulungele umnotho, nje-ke angisweli litho.’ Awuziboni bonyana nguwe osidwedwe, wokurhawukelwa, ochakileko, ongaboniko nohlubule.

¹⁸ Ngalokho ngiyakweluleka bona uthenge kimi igolide elicoliswe ngomlilo khona uzakuba ngonjingileko; thenga nezambatho ezimhlophe khona uzakwembatha ufihle ihlazo lobubhunubhunu bakho; iye, uthenge nesizelo ongasitjhatjha emehlwenakho ukuze ubone.

¹⁹ Labo engibathandako ngiyabasola bengibakhalimele; nje-ke tjhiseka, uphenduke!

²⁰ Qala, ngijame emnyango ngiyakokoda! Nakube umuntu uzwa ilizwi lami avule, ngizakungena kuye ngidle naye, naye adle nami.

²¹ Ohlulako ngizomnikela ilungelo lokuhlala nami esihlalweni sami sobukhosi, kuzakuba njengombana nami ngahlula bengahlala noBaba esihlalweni sakhe sobukhosi.

²² “Onendlebe akezwe lokho uMoya akutjhoko emabandleni!”