ISAMBULO 22 - IsiNdebele 2012 Translation

Umlambo wokuphila

¹ Ingilozi yangitjengisa umlambo wamanzi wokuphila, udarhe njengerhalasi, ugeleza uvela esihlalweni sobukhosi bakaZimu neMvana,

² ubhubhudlha udabula hlangana nendlela yomuzi. Nca zombili zomlambo kwamila umuthi wokuphila oneenthelo ezimihlobo elitjhumi nambili, uhloma iinthelo zawo inyanga nenyanga; amakari wawo angawokwelapha izizwe.

³ Angeze kusabakhona ilitho lamanikelela elizakufunyaneka lapho. Isihlalo sobukhosi sakaZimu neMvana sizokuba kiwo neenceku zakhe zizamlotjha.

⁴ Zizakubona ubuso bakhe nebizo lakhe litlolwe eempandleni zazo.

⁵ Angeze kusabakhona ubusuku, abasadingi ukukhanya kwesibani nanyana kwelanga ngombana uZimu uSomnini uzokuba kukhanya kwabo, bazakubusa naye nini nanini.

UJesu uyeza msinyana

⁶ Ingilozi yathi kimi: “Amezwi la athembekile aliqiniso ngombana uSomnini uZimu wemimoya yabaphorofidi, wathumela ingilozi yakhe bona izokutjengisa iinceku zakhe lokho okuzokwenzeka msinyana.”

⁷ “Yelelani, ngiyeza msinyana! Ubusisiwe loyo obulunga amezwi wesiphorofido sencwadi le.”

⁸ Mina Jwanisi nginguye owezwako bewabona izintwezi. Kuthe lokha nangizizwako ngizibona, ngawela phasi eenyaweni zengilozi ebigade ingitjengisa zona,

⁹ kodwana yona yathi kimi: “Ungakwenzi lokho! Ngiyinceku kanye nawe nabazalwana bakho, abaphorofidi kanye nalabo ababulunga amezwi wencwadi le. Yeke, lotjha kwaphela uZimu!”

¹⁰ Yathi kimi: “Ungavali amezwi wencwadi yesiphorofido le ngombana isikhathi siseduze.

¹¹ Loyo owenza okukhohlakeleko akahlale enza okukhohlakeleko; kuthi osilapheleko ahlale angosilapheleko; kodwana olungileko akahlale enza ukulunga nocwengileko ahlale acwengile.”

¹² “Yelela, ngiyeza msinyana; ngiphethe umvuzo kobana ngikhokhele loyo naloyo ngokwemisebenzi yakhe.

¹³ Mina ngingu-Alfa no-Omega, wokuthoma nowamaphelelo, iye, ukuthoma nokuphela.

¹⁴ “Babusisiwe labo abahlanza izembatho zabo ukuze babe nelungelo emthini wokuphila, bangene emzini ngamasango.

¹⁵ Ngaphandle kunezinja, abaloyi, iinhlobongi, ababulali, abalotjha iinthombe nabo boke abathanda nabenza ikohliso.

¹⁶ “Ngimi mina Jesu engithumele ingilozi yami kini kobana izokufakaza ngezintwezi emabandleni. Ngimurabhu nomlibo kaDavida, ikhwezi lokusa elinyamazelako.”

¹⁷ UMoya nomlobokazi bathi: “Yiza!” Nozwako akatjho athi: “Yiza!” Omunye nomunye owomileko akeze; nanyana ngubani othandako akathathe amanzi wokuphila ngesihle.

Isiphetho

¹⁸ Ngilemukisa woke ozwa amezwi wesiphorofido sencwadi le: Ngithi nangabe kukhona owengezelela ilitho kiwo, uZimu uyokungezelela iinhlupheko ezihlathululwe encwadini le;

¹⁹ nangabe kukhona ophungula emazwini wesiphorofido sencwadi le, uZimu uzakususa isabelo sakhe emthini wokuphila nemzini ocwengileko, ekuzizinto ezihlathululwe encwadini le.

²⁰ Ofakazako ngezintwezi uthi: “Kwamambala, ngiyeza msinyana.” Amen. Yewuze Kosi Jesu!

²¹ Umusa weKosi yethu uJesu, awube nabantu boke. Amen.