ISAMBULO 21 - IsiNdebele 2012 Translation

Izulu nephasi elitjha

¹ Nje-ke ngabona izulu elitjha nephasi elitjha ngombana izulu lokuthoma nephasi lokuthoma besele kudlulile, nelwandle belingasekho.

² Ngabona umuzi ocwengileko, iJerusalema elitjha, lehla livela kuZimu ezulwini, lilungiswe njengomlobokazi aqobotjhelele umyeni wakhe.

³ Ngezwa ilizwi elikhulu livela esihlalweni sobukhosi lithi: “Qala indlu kaZimu seyihlangana nabantu. Uyokuhlala nabo njengoZimu wabo bona babe sisizwe sakhe, iye, uZimu ngokwakhe uzakuba nabo abe nguZimu wabo.

⁴ Uzokwesula zoke iinyembezi emehlwenabo. Ukufa angekhe kusaba khona, ngitjho nokulila nobuhlungu angekhe kusaba khona ngombana izinto zokuthoma zidlulile.”

⁵ Loyo osesihlalweni sobukhosi wathi: “Qala, ngenza koke kube kutjha!” Wathi godu: “Kutlole lokhu ngombana amezwi la athembekile begodu aliqiniso.”

⁶ Nje-ke wathi kimi: “Sekwenziwe! Mina ngingu-Alfa no-Omega, ukuthoma nokuphela. Owomileko ngizamseza amanzi ngesihle emthonjeni wamanzi wokuphila.

⁷ Loyo oyokuhlula uzakudla ilifa lezintwezo begodu mina ngizakuba nguZimakhe yena abe mntwanami.

⁸ Kodwana amatjhatjha, abangakholwako, abasilapheleko, ababulali, iinhlobongi, abenza imilingo, abalotjha abosingazimu nabo boke abaleya amanga isabelo sabo sizakuba selitsheni elivuthako lomlilo nesibabuli, okukukufa kwesibili.”

IJerusalema elitjha

⁹ Enye yeengilozi ezilikhomba eziphethe izitja ezilikhomba ezizele iinhlupheko ezilikhomba zokuphela, yeza kimi yafese yathi: “Yiza ngikutjengise umlobokazi, umkaMvana.”

¹⁰ KuMoya yangithwala yangisa entabeni ekulu nephakamileko, yangitjengisa umuzi ocwengileko okutjho iJerusalema, wehlela phasi uvela ezulwini kuZimu.

¹¹ Bewunephazimulo kaZimu nokukhanya okunjengobuphaziphazi obuligugu njengelitje elihle khulu ijasiperi elidarhe njengomabula.

¹² Bewunomthangala omkhulu ophakemeko onamasango alitjhumi nambili alindwe ziingilozi ezilitjhumi nambili. Emasangweni bekutlolwe ngokugobhodlha amabizo alitjhumi nambili weenkoro zakwa-Israyeli.

¹³ Bekunamasango amathathu ngeswazini langepumalanga, amathathu ngetlhagwini, amathathu ngesewula namathathu ngetjingalanga.

¹⁴ Begodu umthangala womuzi bewuneensekelo ezilitjhumi nambili obekutlolwe kizo amabizo wabapostoli abalitjhumi nambili beMvana.

¹⁵ Ingilozi eyangikhulumisako beyiphethe ilithi lokulinganisa legolide kobana ilinganise ngalo umuzi namasango wawo kanye nemithangala yawo.

¹⁶ Umuzi bewendlaleke unguncazine, ubude nobubanzi bawo kulingana. Nje-ke yalinganisa umuzi ngelithi layo kwaba makhilomitha aziinkulungwana ezimbili namakhulu amabili; iye, ubude bawo bungangobubanzi nokuphakama kwawo.

¹⁷ Godu yalinganisa umthangala, kwaba mamitha amatjhumi alikhomba namabili ngokwesilinganiso sabantu ingilozi eyasisebenzisako.

¹⁸ Umthangala wakhiwe ngejasiperi, khisibe umuzi wakhiwe ngegolidembala, udarhe njengerhalasi.

¹⁹ Iinsekelo zomthangala womuzi zihlotjiswe ngemihlobo yoke yamatje amahle: lokuthoma lijasipi, lesibili kuyisafaya, lesithathu kuyikhalikedoni, lesine kuyisimaragidu,

²⁰ lesihlanu kuyisaridoniksi, lesithandathu kuyisaridiyu, lekhomba kuyikrisolithe, lobunane kuyibherili, lethoba kuyithophazi, letjhumi kuyikrisopirasi, letjhumi nanye kuyiyakintu, letjhumi nambili kuyi-amethisi.

²¹ Amasango alitjhumi nambili kumamatje aligugu, alitjhumi nambili; ngilelo nalelo sango lililitje eliligugu ngokwalo. Indlela yomuzi iligolide, ikhanya ubone ngale njengerhalasi.

²² Azange ngalibona ithempeli hlangana nomuzi ngombana ithempeli lawo linguSomnini uZimu uMninimandlawoke neMvana.

²³ Umuzi lo awudingi ilanga namkha inyezi bona kuyikhanyisele ngombana iphazimulo kaZimu imkhanyo wawo neMvana isibani sawo.

²⁴ Izizwe zephasi ziyokukhamba emkhanyweni wawo, amakhosi wephasi ayokuletha idumo lawo kiwo.

²⁵ Amasango wawo angekhe avalwa ilanga loke nobusuku angekhe baba khona lapho.

²⁶ Abantu bayokwethula kiwo ubuphaziphazi nedumo lezizwe.

²⁷ Kodwana akukho okusilapheleko okuyongena kiwo okutjho owenza amanyala namkha othoma amanga, kwaphela abatlolwe encwadini yokuphila yeMvana.