ISAMBULO 20 - IsiNdebele 2012 Translation

Iminyaka eyikulungwana

¹ Nje-ke ngabona ingilozi yehla ivela ezulwini, ngesandleni sayo iphethe isihluthulelo somgodi onganamkhawulo neketani ekulu.

² Yabamba unomrhaso okutjho inyoka endala (godu ebizwe bona nguDeveli noSathana) yambopha ikulungwana yeminyaka,

³ yamphosela ngemgodini onganamkhawulo, yamvalela ngci beyabeka iphawu phezu kwakhe khona angazubuya aluthe izizwe bekuphele ikulungwana yeminyaka. Emva kwalokho kufanele athukululwe kwesikhatjhana.

⁴ Ngabona iinhlalo zobukhosi, labo ebebahlezi kizo banikelwa amandla wokugweba. Ngabona nemiphefumulo yalabo abaquntwe iinhloko ngebanga lobufakazi babo ngoJesu nangelizwi lakaZimu. Abazange balotjhe isibandana namkha umfanekiso waso; begodu abazange babekwe iphawu laso eempandla zabo namkha ezandleni zabo. Babuya baphila bebabusa noKrestu ikulungwana yeminyaka.

⁵ Inengi labahlongakeleko azange livuke bekwaphela ikulungwana yeminyaka. Lokhu kukuvuka ekufeni kokuthoma.

⁶ Babusisiwe begodu bacwengile labo abanesabelo ekuvukeni kokuthoma. Ukufa kwesibili akunamandla phezu kwalaba, kodwana bayokuba baphristi bakaZimu nebakaKrestu begodu bayokubusa naye iminyaka eyikulungwana.

Ukubhujiswa kwakaSathana

⁷ Kuyokuthi lokha iminyaka eyikulungwana nasele iphelile, uSathana akhutjhwe ngesikhungweni sakhe,

⁸ aphumele ukukhohlisa izizwe emagumbini amane wephasi, ezinguGogi noMagogi, azihlanganise kobana zizokulwa ipi; ubunengi bazo bunjengetjhwabatjhwaba yelwandle.

⁹ Zaphuma zarhwanta zidabula iphasi zazombeleza indawo yabacwengileko kanye nomuzi othandekako. Kodwana kwehla umlilo ezulwini wabaqothula.

¹⁰ USathana ogade abakhohlisile waphoswa ngelitsheni lomlilo nesibabuli, lapho isibandana kanye nomphorofidi wamanga bakhona, bayokutshwenywa isiphelani ubusuku nemini.

Ukugwetjwa kokugcina

¹¹ Ngabona isihlalo sobukhosi esikhulu nesimhlophe naloyo ohlezi kiso. Iphasi nesibhakabhaka kwabaleka phambi kwakhe, kwanyamalala.

¹² Ngabona abafileko, abakhulu nabancani, bajame phambi kwesihlalo sobukhosi neencwadi zavulwa. Godu kwavulwa nenye incwadi ekuyincwadi yokuphila. Abafileko bagwetjwa ukuya ngemisebenzi abayenzileko, kwaya njengombana kutloliwe eencwadini.

¹³ Ilwandle lakhupha boke abafileko ebebakilo. Ukufa nendawo yabafileko kwakhupha abafileko ebebahlezi kikho; boke bagwetjwa ukuya ngokwemisebenzi abayenzileko.

¹⁴ Ukufa nendawo yabafileko kwaphoswa ngelitsheni lomlilo. Lokhu kukukufa kwesibili, ilitsha lomlilo.

¹⁵ Loyo ibizo lakhe elingazange lifunyanwe encwadini yokuphila waphoswa ngelitsheni lomlilo.