ISAMBULO 2 - IsiNdebele 2012 Translation

Kuthunyelwa umlayezo e-Efesu

¹ “Kiyo ingilozi yebandla le-Efesu tlola uthi: Naku umlayezo waloyo ophethe iinkwekwezi ezilikhomba esandleni sakhe sesidla, okhamba hlangana nezinti zeembani zegolide ezilikhomba:

² Ngiyayazi yoke imisebenzi yakho, ukukhuthala nokunyamezela kwakho. Ngiyazi bona uyabhalelwa ukubanyamezelela abambi; kodwana wabalinga labo abathi bona babapostoli khisibe abasibo, wabafumana barhwaya amanga.

³ Wathi unokunyamezela, watshwenywa khulu ngebanga lebizo lami, awuzange udinwe.

⁴ Kodwana nginalokhu ngawe: Ulilahlile ithando lakho lokuthoma.

⁵ Khumbula lapho uwe khona, uphenduke wenze imisebenzi ebewuyenza ekuthomeni. Nakungasinjalo ngizokuza kuwe, ngisuse ilithi lesibani endawenalo nawungaphendukiko.

⁶ Kodwana kuwe kukhona lokhu kokuthi uzonde imisebenzi yamaNikholawo, engiyizondako nami.

⁷ “Onendlebe akezwe lokho uMoya akutjhoko emabandleni. “Loyo owahlulako ngiyomnikela ilungelo lokobanyana adle emthini wokuphila osepharadesi lakaZimu.”

Kuthunyelwa umlayezo eSmirna

⁸ “Godu kiyo ingilozi yebandla leSmirna tlola uthi: Naka amezwi avela kiloyo ongowokuthoma newokuphela, owafako wabuye waphila godu:

⁹ Ngiyabazi ubudisi nobuchaka bakho kodwana khisibe unjingile; ngazi nehlamba yalabo abathi bamaJuda bangasiwo kodwana balisinagogi lakaSathana.

¹⁰ Ungesabi lokho ozakuhlupheka ngakho. Yelela, uSathana usazokudlhunya abanye benu ngesikhungweni ukuze nizizinywe, nibe nobudisi amalanga alitjhumi. Thembeka bekube sekufeni, ngizakupha isihlohlo sokuphila.

¹¹ “Onendlebe akezwe lokho uMoya akutjhoko emabandleni. “Ohlulako akasoze oniwa kukufa kwesibili.”

Kuthunyelwa umlayezo ePhergamu

¹² “Kiyo ingilozi yebandla lePhergamu tlola uthi: Naka amezwi waloyo ophethe isabula ebukhali ngapha nangapha:

¹³ Ngiyakwazi lapho uhlala khona, iye, lapha uSathana ajamise khona isihlalo sakhe sobukhosi. Nokho ubambelele ebizweni lami begodu azange uphike ukukholwa kimi ngitjho nemihleni ka-Antiphasi, ufakazi wami othembekileko, owabulawelwa hlangana nani lapha uSathana aphila khona.

¹⁴ Kodwana kukhona okungangiphathi kuhle ngawe: Kukhona abathileko hlangana nani ababambelele eemfundisweni zakaBhalamu, owafundisa uBhalaki bona abeke isikhubekiso phambi kwabakwa-Israyeli, kobana badle okuhlatjelwe iinthombe nokuziphatha ngobufebe.

¹⁵ Ngokunjalo nahlangana nani godu kukhona nabanye abalandela iimfundiso zamaNikholawo.

¹⁶ Nje-ke phenduka! Nakungasinjalo ngiyeza kuwe masinyana kobana ngilwe nabo ngesabula yomlomami.

¹⁷ “Onendlebe akezwe lokho uMoya akutjhoko emabandleni. “Ohlulako ngizomupha imana ethukusiweko; ngimnikele ilitje elimhlophe ekutlolwe kilo ibizo elitjha elingaziwa mumuntu ngaphandle kwaloyo olamukelako.”

Umlayezo eThiyathira

¹⁸ “Kiyo ingilozi yebandla leThiyathira tlola uthi: Naka amezwi weNdodana kaZimu, enamehlo inga malangabi womlilo, iinyawo zayo ziphazima njengedzila etsengiswe ngemlilweni ithi:

¹⁹ Ngiyayazi imisebenzakho, ithando nokukholwa kwakho, ukulotjha nokunyamezela kwakho nokuthi imisebenzakho idlula yokuthoma.

²⁰ Kodwana indabami ngawe kukobana unyamezelela umfazi okuthiwa nguJezebheli, ozibiza athi umphorofidi bona afundise iinsebenzi zami bona zenze ubufebe nokudla okuhlatjelwe iinthombe.

²¹ Ngamnikela ithuba lokuphenduka, kodwana akhange afune ukuphenduka ebufebeni bakhe.

²² Yelela-ke, ngizomphosela embhedeni weenhlungu, kuthi labo ahlobonga nabo ngibaphosele ekubandezelekeni okukhulu nakube abaphenduki emisebenzinakhe.

²³ Ngizobabhubhisa abantwana bakhe; amabandla woke azakwazi bona nginguloyo ohlola iziso neenhliziyo begodu ngizokuvuza omunye nomunye wenu ngokwemisebenzakhe.

²⁴ “Nje-ke ngithi kini nakwabanye abaseThiyathira, labo abanganamatheli efundisweni le nabangakafundi lokho ekuthiwa ngokuzikileko kwakaSathana, ‘Angisanithwesi omunye umthwalo,

²⁵ kwaphela bambelelani kilokho eninakho bengifike.’

²⁶ “Loyo owahlulako, enze imisebenzami bekube sekupheleni, ngiyomupha ilungelo lokubusa izizwe.

²⁷ Uzozibusa ngentonga yesimbi, aziphahlaze zibe ziincucwana njengembiza yomdaka, iye, njengalokha nami ngamukela kuBaba.

²⁸ Godu ngizomnikela ikhwezi lokusa.

²⁹ “Onendlebe akezwe lokho uMoya akutjhoko emabandleni.”