ISAMBULO 18 - IsiNdebele 2012 Translation

Ukuwa kweBhabheli

¹ Emva kwalokho ngabona enye ingilozi yehla ibuya ezulwini. Beyinegunya elikhulu; iphasi lenziwa bona likhanye ngebanga lephazimulo yayo.

² Yarhuwelela ngelizwi elikhulu yathi: “Liwile! Liwile iBhabheli elikhulu! Seliyindawo yokuhlala amadimoni, isikhungo sayo yoke imimoya esilapheleko, isikhungo seenyoni zoke ezisilapheleko, isikhungo sazo zoke iinbadana ezisilapheleko nezizondekileko.

³ Ngebanga lokobana zoke izizwe zisele iwayini elihlanyisako lobungwadla balo, amakhosi wephasi ahlobonge nalo, nabarhwebi bephasi banjingile ngomnotho wokutamasa kwalo.”

⁴ Nje-ke ngezwa elinye ilizwi ezulwini lisithi: “Phumani niphele kilo, bantu bami ukuze ningahlanganyeli nezono zalo, nokobana ningamukeli iinhlungu zalo.

⁵ Izono zalo zidindelelene, zifika ezulwini begodu uZimu ukhumbule ukonakala kwalo.

⁶ Liphatheni njengombana nalo lenzile; libuyiseleleni ngokubuyelelweko kilokho elikwenzileko; niqarhe ngokubuyelelweko ekatjheni elayiqarhako.

⁷ Njengokuzidumisa nokutamasa kwalo, linikeleni isilinganiso sehlupheko nesizi elingako ngombana lizitjela ehliziywenalo lithi, ‘Ngihlezi njengendlovukazi, angisuye umhlolokazi, begodu nesizi angekhe ngalibona!’

⁸ Ngalokho iinhlungu zalo zizakufika ngelanga linye, iye, izifo, ukulila nendlala. Lizakutjhiswa ngomlilo ngombana unamandla uSomnini uZimu, oligwebako.”

⁹ Amakhosi wephasi agade ahlobonga nalo begodu aphila nalo ngokutamasa, ayokulilela apongoloze ngalo lokha nakabona ukwenyuka kwentuthu yokutjha kwalo.

¹⁰ Azakujama buqamamana ngokwesaba ukuhlunguphazwa kwalo athi: “Maye, maye kuwe, muzi omkhulu, Bhabheli muzi onamandla! Ukugwetjhwa kwakho kukufikele nge-awara linye.”

¹¹ Abarhwebi bephasi bayapongoloza bebalililele ngombana akusekho muntu othenga ipahla emikhunjini yabo:

¹² ipahla yegolide, isiliva, ubuphaziphazi namatje aligugu, amatjhila amahle, abubende, asilika natlerebede, iinhlobohlobo zekhuni elinamakha, zoke iimpahla zezinyo lendlovu, iimpahla zesigodo esibizako, ikoporo, isimbi namamabula,

¹³ isinamoni, ezinye iinungo, itjhwalo, iimonyo, iwayini, namafutha we-oliva, ipuphu yekoroyi nokuziintoro, iinkomo nezimvu, iinjomani neenkarana, amakhoboka namaphilo wabantu.

¹⁴ “Isithelo ogade usikhanukela sisukile kuwe. Woke umnotho wakho nobuphaziphazi bakho, kuphelile kuwe. Angekhe kusafunyanwa.”

¹⁵ Abarhwebi abathengisa ipahla leyo bebazuza umnotho kilo, bazakujamela buqamamana ngokwesaba ukuhlunguphazwa kwalo, bazakulila barhahlawule,

¹⁶ bathi: “Uzazizwa, uzazizwa umuzi omkhulu! Wena owembethe amatjhila amahle, okububende nokutlerebede, okghatjiswe ngegolide, ngobuphaziphazi nangamatje aligugu!

¹⁷ Mbala woke umnotho lo urhayilwe nge-awara linye.” Boke abaphathi bemikhumbi, abathaya elwandle, abathayi ngemikhumbi nabo boke abarhweba elwandle, bajamela kude,

¹⁸ barhahlawula isililo lokha nababona intuthu yokutjha kwalo, bathi: “Ngiwuphi umuzi owakhe wafana nomuzi omkhulu lo?”

¹⁹ Bazirhatjha ngethuli eenhloko zabo badazuluka balila bathi: “Maye! Maye kiwo umuzi omkhulu, okwathi boke ebebanemikhombi elwandle, banotha ngebanga lobunjinga bawo! Nge-awara linye sephenduke waba lirubhi.

²⁰ Thabani ngokubhubha kwawo, nina mazulu, nani abacwengileko, abapostoli nabaphorofidi ngombana uZimu uwugwebile wanibuyiselela ngawo.”

²¹ Yeke ingilozi enamandla yadobha ilitje elinjengelokusila yaliphosa ngelwandle, yathi: “Ngiyo-ke le indlela iBhabheli, umuzi omkhulu eliyokuphoswa ngayo phasi, lingabe lisabonwa godu.

²² Umkenenezo wombethi weharibha nabakhaleli, wabavuthela iimfudu neempalapala, awusoze usazwakala kuwe nososino wananyana ngiliphi irhwebo, akasoze asafunyanwa kuwe; ngitjho itjhada elibangwa lilitje lokusila angekhe libuye godu lizwakale ngaphakathi kwakho.

²³ Angekhe kusakhanya isibani kuwe; itjhada lokusina kwedwendwe angekhe lisezwakala kuwe; abarhwebi bakho bebaziinkhulu zephasi, begodu ngobuloyi bakho walutha zoke izizwe.

²⁴ “Ngaphakathi kwakho kwafunyanwa iingazi zabaphorofidi, zabacwengileko nezalabo ababulawako ephasini.”