ISAMBULO 17 - IsiNdebele 2012 Translation

Ingwadlakazi nesibandana

¹ Nje-ke kweza kimi enye yeengilozi ezilikhomba iphethe izitja ezilikhomba yathi kimi: “Yewuze, ngithanda ukukutjengisa isigwebo sengwadlakazi ehlezi phezu kwamanzi amanengi,

² iye, leyo amakhosi wephasi agile nayo imikhuba yobungwadla, bekwathi ngewayini lobungwadla bayo kwadakwa abahlezi ephasini.”

³ Nje-ke ingilozi leyo yangithwala ngoMoya yangisa erhalawumbeni. Lapho ngabona umfazi ahlezi phezu kwesibanda esibubende ebesigcwele amabizo wehlamba, sineenhloko ezilikhomba neempondo ezilitjhumi.

⁴ Umfazi loyo bekembethe okububende nokutlerebede begodu azihlobise ngegolide, ngobuphaziphazi nangamatje amahle aligugu. Ngesandla sakhe bekaphethe ikapho yegolide ebeyizele amanyala nokusilaphala kokuhlobonga kwakhe.

⁵ Epandla yakhe bekunebizo elitlolwe ifihlo ethi: “Bhabheli elikulu, nina weengwadla namanyala wephasi.”

⁶ Ngabona bona umfazi loyo bekadakwe ziingazi zabacwengileko neengazi zabofakazi bakaJesu. Kuthe lokha nangimbonako, ngabamba ongenzasi.

⁷ Kodwana ingilozi yathi kimi: “Urarwa yini kangaka na? Ngizokutjela ifihlakalo yomfazi lo kanye neyesibanda esimthweleko esineenhloko ezilikhomba neempondo ezilitjhumi.

⁸ Isibandana osibonileko sakhe saba khona kodwana kwanjesi asisekho; nje-ke sele sizokukhuphuka ngemgodini onganamkhawulo bese siyabhujiswa. Abantu bephasi amabizo wabo angakatlolwa encwadini yokuphila kwasesisekelweni sephasi, bazokumangala lokha nababona isibandana ngombana sakhe saba khona kodwana kwanjesi asisekho khisibe nokho sizakuba khona.

⁹ “Lokhu kubiza ingqondo enokuhlakanipha: Iinhloko ezilikhomba ziziintaba ezilikhomba okuhlezi kizo umfazi loyo; begodu zimakhosi alikhomba,

¹⁰ phakathi kwawo amahlanu awile, kuphila yinye, enye ayikafiki; kodwana lokha nasele ifikile kufuze ihlale ikhona kwesikhatjhana.

¹¹ Nakusibanda esakhe saba khona kwanjesi asisekho, kuhlekuhle siyikosi yobunane kodwana singenye yalawa alikhomba kwaphela siyokubhujiswa.

¹² “Iimpondo ezilitjhumi ozibonileko zimakhosi alitjhumi agade angakanikelwa ubukhosi bonyana abuse, kodwana asazokunikelwa ilungelo lokobana abe makhosi abuse isikhathi esifitjhani kanye nesibanda.

¹³ Woke anehloso eyodwa, banikela isibandana amandla nelungelo labo lokubusa.

¹⁴ Azokulwa neMvana kodwana iMvana yona izawahlula ngombana iyiKosi yamakhosi noMbusi wababusi; nalabo abangakiyo ngababiziweko, abakhethiweko nabathembekileko.”

¹⁵ Nje-ke ingilozi yathi kimi: “Amanzi owabonileko lapho kuhlezi khona ingwadla, ababantu, aziinqubuthu, azizizwe neenlimi.

¹⁶ Iimpondo ezilitjhumi ozibonileko, zona kanye nesibandana zizakuzonda ingwadla; zizayenza umonakalo ibe hlubule; zizakudla inyama yayo beziyiqothule ngomlilo.

¹⁷ UZimu ukubekile eenhliziyweni zazo bona zenze ihloso yakhe ngokuvuma bona zinikele umbuso wazo esibandeni kufikela lapha amezwi kaZimu apheleliswa khona.

¹⁸ “Umfazi ombonileko umumuzi omkhulu obusa ngaphezu kwamakhosi wephasi.”