ISAMBULO 16 - IsiNdebele 2012 Translation

Izitja zobukhali bakaZimu

¹ Nje-ke ngezwa ilizwi elikhulu livela ethempelini likhuluma eengilozini ezilikhomba lithi: “Khambani niyokuthululela phezu kwephasi izitja ezilikhomba zelaka lakaZimu!”

² Yasuka ingilozi yokuthoma yafese yathulula isitja sayo ephasini. Kwathumbuka iinlonda ezimbi phezu kwalabo ebebanephawu lesibanda begodu balotjha nesithombe somfanekiso waso.

³ Ingilozi yesibili yathululela isitja sayo phezu kwelwandle, laphenduka labangathi ziingazi zesidumbu, kwafa koke okuphilako ngelwandle.

⁴ Ingilozi yesithathu yathululela isitja sayo ngemilanjeni nangemithonjeni, khona kwaphenduka iingazi.

⁵ Ngezwa ingilozi yamanzi ithi: “Ulungile wena okhona nogade uvele ukhona; iye, wena ocwengileko ngombana ugwebile ngalokho.

⁶ “Ngebanga lokobana baphalaze iingazi zabacwengileko nabaphorofidi, ngikho nje ubanikele iingazi bona bazisele ngombana kubafanele!”

⁷ Ngezwa i-aldari liphendula lithi: “Iye, Somnini Zimu Mninimandla, iingwebo zakho zilungile begodu ziliqiniso!”

⁸ Ingilozi yesine yathululela isitja sayo elangeni; lavunyelwa bona litjhise abantu ngesivuthevuthe salo,

⁹ batjha ngomtjhiso obukhali kodwana bathuka ibizo lakaZimu okunguye ogade alawula phezu kweenhlupheko lezo; begodu azange baphenduke bona bamdumise.

¹⁰ Ingilozi yesihlanu yathululela isitja sayo phezu kwesihlalo sobukhosi sesibandana, umbuso waso wabhijwa lilifu elinzima; abantu baziluma amalimu ngebanga lobuhlungu.

¹¹ Bahlambalaza uZimu wezulwini ngebanga leenhlungu neenlonda zabo, begodu azange baphenduke ezenzweni zabo.

¹² Yesithandathu ingilozi yathululela isitja sayo ngemlanjeni omkhulu iYufrathe, amanzi wakhona atjha ukuze kulungiselwe amakhosi avela epumalanga indlela.

¹³ Ngabona imimoya emithathu esilapheleko efana neenrhwarhwa iphuma ngemlonyeni wakanomrhaso nangemlonyeni wesibanda godu nangemlonyeni womphorofidi wamanga.

¹⁴ Lokhu kumimoya yamadimoni agila iziga; begodu iya emakhosini wephasi loke ukuwabutha bona alwe ipi ngelanga elikhulu lakaZimu uMninimandlawoke.

¹⁵ Yelela, ngiza njengesela! Ubusisiwe loyo ohlala aphapheme begodu embethe ukuze angazukukhamba bhunubhunu bekubonwe ihlazo lakhe.

¹⁶ Yeke imimoya yahlanganisa amakhosi endaweni ebizwa ngesiHebheru bona yi-Arimagedoni.

¹⁷ Ingilozi yekhomba yathululela isitja sayo esibangeni; kwaphuma ilizwi elikhulu ethempelini livela esihlalweni sobukhosi lathi: “Sekwenzekile!”

¹⁸ Kwabonakala imibani, ukuraramba, ukutletlebula kokuduma kwezulu nokusikinyeka okukhulu kwephasi okungazange khekube khona soloko kwaba khona abantu ephasini; mbala kwaba kusikinyeka okukhulu!

¹⁹ Umuzi omkhulu waphadlhuka iingcenye ezintathu nemizi yezizwe yawa. UZimu wakhumbula iBhabheli elikhulu, walinikela iwayini lelaka lobukhali bakhe.

²⁰ Zoke iinhlengele zabaleka neentaba azange zisatholakala.

²¹ Isinanja esineengidija ezinobudisi obungaba makhilogremu amatjhumi amane nahlanu, sawulukela phezu kwabantu sehla ezulwini. Abantu bahlambalaza uZimu ngebanga lobuhlungu besinanja ngombana besesabeka kokufa.