ISAMBULO 15 - IsiNdebele 2012 Translation

Iinhlupheko ezilikhomba zokuphela

¹ Ngabona esinye isibonakaliso esikhulu nesirarako ezulwini: Bekuziingilozi ezilikhomba egade zineenhlupheko ezilikhomba, ekungezokugcina ngombana ngazo ilaka lakaZimu liphelisiwe.

² Ngabona lokho okwabonakala sengathi lilwandle lerhalasi livangene nomlilo nalabo ebebahlule isibandananomfanekiso waso kanye nesibalo sebizo laso. Bebajame eduze nelwandle lerhalasi baphethe amaharibha abawanikelwe nguZimu ezandleni zabo.

³ Bavuma irhubo lakaMosi inceku kaZimu kanye nerhubo leMvana, basithi: “Mikhulu iyababazeka imisebenzakho, wena Somnini Zimu Mninimandla! Zilungile begodu ziliqiniso iindlela zakho, wena Kosi yezizwe zoke.

⁴ Somnini, ngubani ongekhe akwesaba begodu adumise ibizo lakho na? Lokhu kungebanga lokobana nguwe wedwa ocwengileko. Izizwe zoke ziyokufika zilotjhe phambi kwakho ngombana iingwebo zakho zisepepeneneni.”

⁵ Ngemva kwalokho ngaqala, ngabona ithempeli elilitende lobufakazi ezulwini livulekile.

⁶ Ethempelinapho kwaphuma iingilozi ezilikhomba neenhlupheko ezilikhomba, zembethe ilineni elidarhileko, ziqakanise imitletlana yegolide eemfubeni zazo.

⁷ Nje-ke esinye seembunjwa ezine eziphilako sanikela iingilozi ezilikhomba izitja ezilikhomba zegolide zizele ubukhali bakaZimu ophila nini nanini.

⁸ Ithempeli lazala intuthu yephazimulo ebuya ebukhosini nemandleni kaZimu. Begodu bekangekho ongangena ngethempelini zingakapheli iinhlupheko ezilikhomba zeengilozi ezilikhomba.