ISAMBULO 14 - IsiNdebele 2012 Translation

IMvana kanye nabantu bayo

¹ Nje-ke ngaphakamisa amehlo, qala naso iMvana ijame entabeni iZiyoni; beyikanye neenkulungwana ezilikhulu namatjhumi amane nane zalabo ebebatlolwe ibizo layo nelakaYise eempandla zabo.

² Ngezwa ilizwi livela ezulwini lihlokoma njengamanzi amanengi, lizwakala njengokuraramba kokuduma kwezulu okwesabekako. Ilizwi engalizwako lalinjengelababethi ababetha amaharibha.

³ Bebavuma ingoma etja phambi kwesihlalo sobukhosi naphambi kweembunjwa ezine eziphilako nabaphathi. Gade angekho obekangafunda ingoma leyo ngaphandle kwalabo abaziinkulungwana ezilikhulu namatjhumi amane nane ebebahlengwe ephasini.

⁴ Laba, ngilabo abangazange bazisilaphaze ngabesifazi ngombana bebasesemsulwa njengamancele. Ngibo-ke abalandela iMvana nanyana kukuphi lapha iya khona. Bebahlengwe ebantwini bafana neenthelo zokuthoma ezisilumo kuZimu nakiyo iMvana

⁵ begodu emilonyeni yabo azange kufunyanwe amanga; bamsulwa.

Iingilozi ezintathu

⁶ Nje-ke ngabona enye ingilozi iphapha phezulu esibangeni, iphethe ivangeli lesiphelani kobana ilitjhumayele kilabo abaphila ephasini. Iye, ezizweni zoke, eenkorweni, eenlimini nemindenini.

⁷ Yarhuwelela yathi: “Mesabeni uZimu nimphazimulise ngombana isikhathi sakhe sokugweba sesifikile! Mlotjheni loyo owenza izulu nephasi, ilwandle nemithombo yamanzi.”

⁸ Nje-ke enye ingilozi yesibili yalandela yathi: “Liwile, liwile iBhabheli elikhulu! Ngilo elenza bona zoke izizwe zisele iwayini lelaka lobungwadla balo!”

⁹ Kwalandela enye ingilozi yesithathu isitjho ngelizwi elikhulu ithi: “Nanyana ngubani olotjha isibandananomfanekiso waso, amukele iphawu epandla namkha esandleni sakhe,

¹⁰ naye uzakusela iwayini lelaka lakaZimu; aliselele ngekatjheni yobukhali bakhe lingakavanganiswa nalitho. Uzakuhlunguphazwa ngomlilo nangesibabuli phambi kweengilozi ezicwengileko naphambi kweMvana.

¹¹ Intuthu yomlilo walabo abahlunguphaziweko yenyuka nini nanini. Ubusuku nemini akukho ukuphumula kilabo abalotjha isibandananomfanekiso waso, iye, komunye nomunye owamukela iphawu lebizo laso.”

¹² Lokhu kubiza ukunyamezela kwabacwengileko, iye, labo abalalela imiyalo kaZimu, banamathele ekukholweni kuJesu.

¹³ Ngezwa ilizwi libuya ezulwini lisithi: “Tlola uthi: Babusisiwe labo abafako bafela kuSomnini kusukela gadesi.” UMoya ocwengileko uthi: “Iye, bazakuphumula ekukhandlekeni kwabo ngombana imisebenzi yabo izabalandela.”

Isivuno sephasi

¹⁴ Ngithe nangiqalako ngabona ilifu elimhlophe kuhlezi kilo ofana neNdodana yoMuntu, anesihlohlo segolide ehloko aphethe nesegere ngesandla.

¹⁵ Kwavela enye ingilozi ngethempelini irhuwelela loyo ohlezi phezu kwelifu isithi: “Khupha isegere yakho uvune ngombana isikhathi sokuvuna sifikile nesivuno sephasi sesivuthiwe.”

¹⁶ Nje-ke loyo ohlezi phezu kwelifu wakghedlha ngesegere ephasini, iphasi lavunwa.

¹⁷ Kwathumbuka enye ingilozi ivela ethempelini lezulwini, nayo beyiphethe isegere ebukhali ngesandla.

¹⁸ Kwavela enye ingilozi ithumbuka e-aldarini, bekuyingilozi enamandla phezu komlilo, yarhuwelela loyo obekaphethe isegere ebukhali yathi: “Khupha isegere yakho ebukhali ubuthelele iintjhutha zesidiribe sephasi ngombana amadiribe waso avuthiwe.”

¹⁹ Nje-ke ingilozi yahlahla ngesegere yayo ephasini yabuthelela isivuno sesidiribe sephasi; yasiphosa ngebutlhodlhelweni obukhulu bewayini lelaka lakaZimu.

²⁰ Ubutlhodlhelo bewayini bagadangwa ngaphandle komuzi, kwavinyilika iingazi ebutlhodlhelweni zaba zinengi zaphakama bekwaba sematomini weenjomani, kwaba libanga ebelingaba mamayela angaba makhulu amabili.