ISAMBULO 13 - IsiNdebele 2012 Translation

¹ Ngabona isibandana senyuka siphuma elwandle, sineempondo ezilitjhumi neenhloko ezilikhomba. Phezu kweempondo zaso lezo bekuneenhlohlo ezilitjhumi kuthi phezu kweenhloko kube namagama weenhlamba.

² Isibandana engasibonako besifana nengwe, iinyawo zaso zifana nezebhere, umlomo ufana newebhubezi. Nje-ke unomrhaso wasinikela amandla nesihlalo sakhe sobukhosi kanye negunya.

³ Enye yeenhloko zesibandana beyinenceba lokufa, kodwana incebelo besele lipholile. Yeke ngokurareka okukhulu, iphasi loke lalandela isibandana.

⁴ Abantu balotjha unomrhaso ngombana bekathwese isibandana igunya, begodu balotjha isibandana bathi: “Ngubani ofana nesibandana, ngubani ongalwa naso na?”

⁵ Isibandana sanikelwa umlomo okhuluma okuphakamileko namezwi wehlamba; begodu savunyelwa bona sisebenzise igunya laso iinyanga ezimatjhumi amane nambili.

⁶ Savula umlomo waso sakhuluma iinhlamba kuZimu, sithuka ibizo nethaberinakeli lakhe kanye nalabo abahlala ezulwini.

⁷ Godu savunyelwa bona silwe nabacwengileko sibahlule. Saphiwa igunya phezu kweenkoro, kwemindeni, kweenlimi nezizwe.

⁸ Boke abantu abakhe ephasini bazasilotjha, iye, woke loyo ibizo lakhe elingakatlolwa encwadini yokuphila yeMvana eyahlatjwako kusukela ekusekelweni kwephasi.

⁹ Onendlebe akezwe!

¹⁰ Nangabe kukhona ogade azakuthunjwa, akaye ekuthunjweni! Nangabe kukhona ogade azakubulawa ngesabula, uzakubulawa ngesabula! Lokhu kubiza ukubekezela nokukholwa kwabacwengileko.

¹¹ Nje-ke ngabona godu esinye isibandana senyuka sivela ephasini. Besineempondo ezimbili njengemvana kodwana besikhuluma njengonomrhaso.

¹² Besisebenzisa loke igunya lesibandana sokuthoma, siqalile. Sakatelela iphasi nabo boke abahlala kilo bona balotjhe isibandana sokuthoma, leso inceba laso lokufa ebesele lipholile.

¹³ Sagila iimbonakaliso ezikulu sabe senza nomlilo ophuma ezulwini, wehlele ephasini phambi kwabantu baqalile.

¹⁴ Begodu ngeembonakaliso esaphiwa bona sizenze phambi kwesibanda sokuthoma, sakhohlisa abakhileko ephasini. Sabatjela bona babumbe isithombesibunjwa sesibanda ebegade sinengozi yesabula, kodwana nokho sabuye saphila.

¹⁵ Saphiwa amandla bona senze isithombesibunjwa sesibanda siphefumule ukuze isithombesibunjwa esimfanekiso leso sikhulume. Begodu senza nokobana labo abangalotjhi umfanekiso wesibanda leso babulawe.

¹⁶ Godu sakatelela boke, okutjho omncani nomkhulu, onjingileko nochakileko, okhululekileko nolikhoboka bonyana babekwe iphawu esandleni sabo sangesidleni namkha epandla

¹⁷ ukuze kungabikhona ongathenga namkha athengise nakanganalo iphawu, okutjho ibizo lesibanda namkha isibalo sebizo laso.

¹⁸ Lokhu kubiza ukuhlakanipha: Nje-ke akuthi nanyana ngubani ozwisisako abale isibalo sesibanda namkha isibalo sebizo laso ngombana isibalo saso ngesomuntu. Isibalo saso simakhulu amathandathu namatjhumi asithandathu nesithandathu.