ISAMBULO 12 - IsiNdebele 2012 Translation

Umfazi nonomrhaso

¹ Kwavela isibonakaliso esimangazako ezulwini: Umfazi embethe ilanga, inyezi ingaphasi kweenyawo zakhe, ehloko athwele isihlohlo seenkwekwezi ezilitjhumi nambili.

² Bekasidisi begodu alila ngemirhelo.

³ Kwabonakala esinye isibonakaliso ezulwini. Qala nango unomrhaso omkhulu obomvu, oneenhloko ezilikhomba, iimpondo ezilitjhumi neenhlohlo ezilikhomba eenhlokweni zakhe.

⁴ Umsila wakhe wawola ingcenye yesithathu yeenkwekwezi zezulu, waziwululela ephasini. Nje-ke unomrhaso wajama phambi komfazi obekasele azokubeletha ukuze azokudla umntwanakhe loyo emva kobana abelethiwe.

⁵ Wabeletha umsana oyokubusa izizwe zoke ngentonga yesimbi. Nje-ke umntwana womfazi loyo wahlwithwa wasiwa esihlalweni sakaZimu sobukhosi;

⁶ umfazi yena wabalekela erhalawumbeni lapha bekanendawo ayilungiselwa nguZimu ukuze ondliwe lapho amalanga ayikulungwana namakhulu amabili anamatjhumi asithandathu.

⁷ Kwaba khona ipi ezulwini; uMikhayeli neengilozi zakhe bekalwa nonomrhaso; unomrhaso neengilozi zakhe bazibuyiselela,

⁸ kodwana bebanganamandla aneleko yeke bahlulwa nendawabo yangasabikhona ezulwini.

⁹ Ngalokho waphoswa phasi unomrhaso omkhulu, inyoka endala ekuthiwa nguMtjoli noSathana, umkhohlisi wephasi loke; iye, waphoselwa ephasini neengilozi zakhe zalahlwa naye.

¹⁰ Yeke ngezwa ilizwi elikhulu ezulwini lisithi: “Nje-ke kufike isindiso, amandla nombuso kaZimethu; igunya lingelakaKrestu ngombana ummangaleli wabazalwana bethu wehliselwe phasi; iye, loyo obamangalela phambi kwakaZimu ubusuku nemini.

¹¹ Bona bamhlula ngeengazi zeMvana nangelizwi lobufakazi babo begodu akhange banconcosele ipilo yabo bekwaba sekufeni.

¹² Ngalokho thokozani-ke nina mazulu, nani noke enihlala kiwo! Kodwana maye kuwe phasi, nawe lwandle! Mbala uSathana wehlela kini, ugcwele ilaka uyadlhabhaza ngombana uyazi bona isikhathi sakhe sifitjhani.”

¹³ Kuthe bona unomrhaso abone bonyana upharwe phasi ephasini, wazuma umfazi osanda ukubeletha umntwana womsana.

¹⁴ Kodwana umfazi waphiwa iimpiko ezimbili zekhozi elikhulu bona aphaphele endaweni alungiselelwe yona ngerhalawumbeni, lapha azakondliwa khona kwesikhatjhana, iinkhatjhana nengcenye yesikhathi, lapha inyoka ingeze yamfikela khona.

¹⁵ Nje-ke kwabhubhudlha amanzi aphuma ngemlonyeni wenyoka kwaba inga mlambo ngemva komfazi kobana akhukhulwe.

¹⁶ Kodwana iphasi laba lisizo emfazini loyo; lavula umlomo walo laginya amanzi agade abhubhudlha emlonyeni wakanomrhaso.

¹⁷ Ngalokho unomrhaso wabila khulu ngomfazi loyo, nje-ke wasuka wayokusahlela boke abantwana bakhe, okutjho labo abalalela imiyalo yakaZimu nababambelele ebufakazini bakaJesu.

Isibandana sokuthoma

¹⁸ Nje-ke unomrhaso wajama eligwini lelwandle.