ISAMBULO 11 - IsiNdebele 2012 Translation

Abofakazi ababili

¹ Nganikelwa ilithi lokulinganisa elinjengedondolo bekwathiwa kimi: “Sikima ulinganise ithempeli ne-aldari lakaZimu, ubale nalabo abalotjha lapho,

² kodwana ungayilinganisi ikundla engaphandle kwethempeli, ilise ngombana inikelwe izizwe begodu zizokugadanga emzini ocwengileko iinyanga ezimatjhumi amane nambili.

³ Ngizokunikela abofakazi bami ababili amandla wokuphorofida amalanga ayikulungwana enamakhulu amabili namatjhumi asithandathu.”

⁴ Labo bangiyo imithi emibili ye-oliva nezinti ezimbili zesibani ezijame phambi kwakaSomnini iKosi yephasi.

⁵ Nakukhona ofuna ukubakhubaza, kuphuma umlilo emilonyeni yabo iqothule amanaba wabo; ngileyo-ke indlela ekuthi loyo olinga ukubalimaza ekufuze abulawe ngayo.

⁶ Banegunya lokuvala isibhakabhaka ukuze izulu lingani ngesikhathi abatjhumayela ngaso. Begodu banegunya lokuphendula amanzi abe ziingazi nokumadlha iphasi nanyana ngasiphi isifo ngokuthanda kwabo.

⁷ Kuzakuthi lokha nasele baqede ubufakazi babo, isibandana siphume ngemgodini onganamkhawulo silwe nabo, sibahlule besibabulale.

⁸ Iindumbu zabo ziyokurabhalala eendleleni zomuzi omkhulu obizwa ngokwesiphorofido bona yiSodoma neGibhide, lapha godu neKosi yabo yabethelwa khona.

⁹ Abantu abavela emindenini, eenkorweni, eenlimini nezizweni bayokurhudulela iindumbu zabo amehlo amalanga amathathu nesiquntu bebangavumi bona zibulungwe.

¹⁰ Abantu bephasi bazakucanasa ngabo bebagidinge ngokuphana izipho. Lokho bazakwenza ngombana abaphorofidi ababilabo babe lihlupho ebantwini abahlala ephasini.

¹¹ Kodwana ngemva kwamalanga amathathu nesiquntu kwangena kibo ummoya ophilisako uvela kuZimu, nje-ke basikima bajama ngeenyawo, kwathi labo abababonako bafikelwa kukwesaba.

¹² Bezwa ilizwi livela ezulwini lisithi kibo: “Yenyukani nize lapha!” Benyukela-ke ezulwini ngelifu amanaba wabo abaqalile.

¹³ Khonokho kwaba khona ukusikinyeka kwephasi bekwadilika kwetjhumi komuzi. Kwafa abantu abaziinkulungwana ezilikhomba ekusikinyekeni lokho; inengi lesaba beladumisa uZimu wezulwini.

¹⁴ Umaye wesibili sekadlulile; masinyana kuza umaye wesithathu.

Iporompita yekhomba

¹⁵ Nje-ke ingolozi yekhomba yavuthela ipalapala yayo, kwezwakala amezwi ahlokomako ezulwini asithi: “Umbuso wephasi sewuphenduke umbuso wakaSomnini nowakaKrestu begodu uzakubusa nini nanini.”

¹⁶ Abaphathi abamatjhumi amabili nane abahlezi phambi koZimu bawa mbo ngobuso balotjha uZimu,

¹⁷ bathi: “Siyakuthokoza Somnini, Zimu Mninimandlawoke, wena okhona nogade uvele ukhona, iye, siyakuthokoza ngombana uthethe amandlakho amakhulu, uthomile uyabusa.

¹⁸ Izizwe zithukuthele kodwana ilaka lakho lifikile, okusikhathi sokugweba labo abangasekho ukuze uvuze iinceku zakho okubaphorofidi; iye, kuvuzwe nabacwengileko bakho okungilabo abesaba ibizo lakho, abakhulu nabancani begodu kubhujiswe labo ababhubhisa iphasi.”

¹⁹ Ithempeli lakaZimu ezulwini lavuleka petle, kwabonakala i-aldari lesivumelwano lingethempelinapho; begodu bekukhona ukubaneka kwemibani, ukuraramba, ukutletlebula kokuduma kwezulu, ukusikinyeka kwephasi kanye namagidija wesinanja.