ISAMBULO 10 - IsiNdebele 2012 Translation

Ingilozi nomsongo omncani

¹ Ngabona enye ingilozi enamandla amakhulu yehla ezulwini, iphuthelwe lilifu inezungu leKosi ehloko. Ubuso bayo bebunjengelanga nemilenzayo injengeensika zomlilo.

² Ngesandleni sayo beyiphethe umsongo omncani ovuliweko. Beyitlakalajile ibeke inyawo layo langesidleni elwandle, langesinceleni yalibeka ehlabathini.

³ Yarhuwelela ngelizwi elikhulu elizwakala njengokubhodla kwebhubezi. Kuthe nayirhuwelelako, kwezwakala imidumo elikhomba.

⁴ Lokha nakuzwakala imidumo elikhomba nami besele ngizilungiselele ukutlola, kodwana ngezwa ilizwi livela ezulwini lisithi: “Kugibe ngephawu lokho okukhulunywe midumo elikhomba, ungakutloli.”

⁵ Ingilozi engayibonako itlakalajele ngelwandle nehlabathini yaphakamisela isidla ezulwini,

⁶ yafunga ngaloyo ophila nini nanini, owabumba izulu nokukilo, iphasi nokukilo, ilwandle nokukilo, yathi: “Angekhe kusaba khona ukuriyada!

⁷ Kodwana emalangeni lokha ingilozi yekhomba nasele izokuvuthela ipalapala yayo, ifihlakalo kaZimu izakupheleliswa njengombana amemezela eencekwini zakhe, abaphorofidi.”

⁸ Nje-ke ilizwi engalizwako likhuluma lisezulwini labuye lakhuluma nami godu lathi: “Khamba uyokuthatha umsongo ovulekileko esandleni sengilozi etlakalajele phezu kwelwandle nehlabathini.”

⁹ Yeke ngaya engilozini ngafese ngayibawa bona inginikele umsongo omncani loyo. Yona yathi kimi: “Yewuwuthathe uwugome! Uzokubaba ngendeni yakho kodwana ube mnandi njengeliju ngemlonyeni wakho.”

¹⁰ Ngawuthatha-ke umsongo omncani loyo esandleni sengilozi ngawugoma. Waba mnandi njengeliju ngemlonyeni wami, kodwana kuthe lokha nangiqedako ukuwugoma, wangijikela wababa ngendeni.

¹¹ Nje-ke kwathiwa kimi: “Kufanele ubuye uphorofide godu ngabantu abanengi, ngezizwe, ngeenlimi nangamakhosi.”