INGOMA YEENGOMA 2 - IsiNdebele 2012 Translation

¹ Ngililikhwa leTjharoni, ithuthumbo lemirhuleni.

Isokana

² Njengelikhwa hlangana nameva sinjalo isinini sami hlangana neentombi.

Intombi

³ Njengomuthi wamahabhula hlangana nehlathi, sinjalo-ke isithandwa sami hlangana namasokana. Maye ngikhanuka kangangani ukuhlala emthunzinaso nesithelo saso sizakuba bulende kurhwalabhami.

⁴ Sangingenisa ngekumbeni yewayini, iphawu laso ngehla kwami bekulithando.

⁵ Yeningiqabule ngamakwapa wediribe, ningikhuthaze ngamahabhula ngombana ngiyagula ngethando.

⁶ Kwanga isandla saso sesincele besingaba ngaphasi kwehlokwami nesidla saso singigone.

⁷ Ntombi zeJerusalema, ngithembisani ngeentsephekazi nangeenhlangukazimataka zommango bona angeze nazamazisa namkha nivuse ithando lingakakhanuki ukuvuka.

⁸ Lalela! Naso isithandwa sami! Qala! Nasi siza nganeno, siza sijekezela eentabeni, seqayeqa emibundwini.

⁹ Isithandwa sami sifana netsephe namkha ihlangumatakana Qala! Nasiya sijame ngemva komthangala wekhethu, sihlola eentunjeni, sitjhaluze emlukweni wamafesidere.

¹⁰ Isithandwa sami sathoma sathi kimi, “Sikima sinini sami, simomothwana sami, yewize sikhambe!

¹¹ Qala! Ubusika budlulile nezulu alisekho, likhambile.

¹² Amakhwa emmangweni ayabonakala, isikhathi sokubhina sifikile, ukukukuruza kwamazuba sele kuzwakala enarheni yekhethu.

¹³ Amakhiwani athela aboporwana bawo, iindiribe ezithuthumbako zisabalalisa iphunga lazo. Sikima sinini sami, simomothwana sami, yewize sikhambe!

¹⁴ Zuba lami elisemipharwini yedwala, endaweni esithekileko yeliwa akhese ungitjengise ubuso bakho, ngizwise iphimbo lakho! Kazi iphimbo lakho libutjhelelezi nobuswana bakho buyakarisa.

¹⁵ Sibambelani iimpungutjha, iye, iimpungutjhana ezonakalisa iindiribe zethu, iindiribe zethu ezithuthumbileko.”

¹⁶ Isithandwa sami ngesami, nami ngingesaso, selusa hlangana namakhwa.

¹⁷ Sithandwa sami, jika, ube yitsephe namkha ihlangumatakana emibundwini ehlukeneko kufikela lapha kubetha khona ummoya wekuseni bekunyamalale imithunzi yobusuku.