AMARHUBO 98 - IsiNdebele 2012 Translation

Dumisani umGwebi

¹ Irhubo. Vumani ingoma etja kuSomnini ngombana wenze iimangaliso. Isidla sakhe nengalwakhe ecwengileko kumlethele ukuhlula.

² USomnini uzwakalise ukuhlula kwakhe, wembule isigwebo sakhe phambi kwezizwe.

³ Wakhumbula ukwethembeka nobuqotho bakhe endlini ka-Israyeli. Imikhawulo yoke yephasi yabona ukuhlula kwakaSomnini.

⁴ Hlokomelani uSomnini nina bephasi loke! Thabani nihlokome begodu nirhube!

⁵ Rhubelani uSomnini ngeharibhana, iye, ngeharibha nomvumo.

⁶ Hlokomani phambi kwakaSomnini umbusi ngeemporompita nomdumo wepalapala.

⁷ Ilwandle alirhube nokugcwala kwalo, iphasi lidume nabahlali balo,

⁸ iinkhukhula ziphorome, iintaba zihlokome kanyekanye

⁹ phambi kwakaSomnini ngombana uyeza uzokugweba iphasi; iye, agwebe ilizwe ngokulunga nezizwe ngokufaneleko.