AMARHUBO 96 - IsiNdebele 2012 Translation

UZimu kumele adunyiswe

¹ Vumani ingoma etja kuSomnini; iphasi loke alivumele uSomnini!

² Vumelani uSomnini, nidumise ibizo lakhe, nilethe iindaba ezimnandi zesindiswakhe imihla ngemihla.

³ Memezelani iphazimulwayo ezizweni neemangaliso zayo hlangana nabantu boke.

⁴ Mbala mkhulu uSomnini begodu kumele adunyiswe ngamandla. Yena wesatjwa ngaphezu kwabozinyana boke

⁵ ngombana abosingazimu babantu baziinthombe nje kwaphela. USomnini wawenza amazulu,

⁶ ukuhlonitjhwa nobukhosi kuphambi kwakhe, iye, amandla nephazimulo kusethempelini lakhe.

⁷ Lethani kuSomnini nina nkoro zezizwe; iye, lethani kuSomnini idumo namandla.

⁸ Lethani kuSomnini idumo elifanele ibizo lakhe; lethani iminikelo, ningene esirhodlweni sethempeli lakhe.

⁹ Lotjhani uSomnini ekucwengeni kwephazimulwakhe; iphasi loke alithuthumele phambi kwakhe.

¹⁰ Memezelani ezizweni nithi: “USomnini uyabusa! Ilizwe lihlezi lanzinza, angeze lanyakaziswa. Uzakugweba izizwe ngokufaneleko.”

¹¹ Amazulu akathabe, iphasi lijabule, ilwandle lihlokome nakho koke okukilo.

¹² Ummango awusase nakho koke okukiwo, yoke imithi yehlathi ihlokome

¹³ phambi kwakaSomnini ngombana uyeza, iye, uyeza bona azokugweba iphasi. Uzakugweba ilizwe ngokulunga nezizwe ngeqiniso lakhe.