AMARHUBO 95 - IsiNdebele 2012 Translation

Ukumenyelwa ukulotjha uSomnini

¹ Yenize sihlokomele uSomnini; iye, sihlokomalele iDwala lesindiswethu!

² Asitjhideleni phambi kwakhe ngokuthokoza, simhlokomalele ngeengoma!

³ Mbala, uSomnini unguZimu omkhulu nombusi omkhulu ngaphezu kwabozinyana.

⁴ Esandleni sakhe uphethe ukuzika kwephasi, iinqongo zeentaba nazo zingezakhe.

⁵ Ilwandle lingelakhe ngombana walenza nezandla zakhe zabumba indawo eyomileko.

⁶ Yizani simlotjhe simkhothamele, siguqe phambi kwakaSomnini umenzethu!

⁷ Mbala, yena unguZimethu, thina sibabantu bedlelo lakhe nomhlambi wesandla sakhe. Namhlanje kwanga ningalalela iphimbo lakhe ngombana wathi:

⁸ “Ningaqinisi iinhliziyo zenu njengeMeriba nanjengelangeni lelo eMasa, erhalawumbeni,

⁹ lapha aboyihlomkhulu bangizizinya khona, bangilinga nanyana besele babonile umsebenzami.

¹⁰ Iminyaka ematjhumi amane isizukulwaneso sangikghabhudlha. Nje-ke ngathi, ‘Sibabantu abaphambene ngehliziyo, neendlela zami asiziyeleli.’

¹¹ Ngalokho ngafunga elakeni lami ngathi, ‘Angeze bangene ekuphumuleni kwami.’ ”