AMARHUBO 94 - IsiNdebele 2012 Translation

UZimu umbuyiseleli wabalungileko

¹ Zimu obuyiselelako, Somnini, iye, wena Zimu obuyiselelako, khanya ngokudarhileko!

² Sikima wena mgwebi wephasi, uphe abazitjhayako okubafaneleko!

³ Somnini, kuzabe kube nini iinkhohlakali ziziphakamisa, iye, kuzabe kube nini zidlondlobala na?

⁴ Zikhuluma ngamaganyana wokuzitjhaya iye, zoke iingilamkhuba ziyazikhakhazisa.

⁵ Ziqova abantu bakho, Somnini, zigandelela ilifa lakho.

⁶ Zibulala umhlolokazi nesikhonzi, iye, zitjhabalalisa iintandani,

⁷ zibuye zithi: “USomnini akaboni; uZimu kaJakopo akanaki.”

⁸ Yelelani nina bantu abalibeleko! Nina ndlhayela ndina, nizakuhlakanipha nini?

⁹ Owanameka indlebe, akezwa na? Owahlomela ilihlo, akaboni na?

¹⁰ Okhalimela bezizwe, akabethi na? Mbala ofundisa umuntu ilwazi,

¹¹ unguSomnini owazi imicabango yomuntu kobana ililize lakolize.

¹² Ubusisiwe omkhalimelako Somnini; iye, loyo omfundisa ngomthethwakho

¹³ ukuze umnikele ukuphumula emalangeni amambi, ukufikela lapha isikhohlakali senjelwa khona umgodi.

¹⁴ Ngambala, uSomnini angeze abatjhiye abantu bakhe, angeze alilahla ilifa lakhe.

¹⁵ Iye, ubulungiswa buzakubuyela kwabalungileko nabaqotho ngehliziyo bazabulandela.

¹⁶ Ngathi: “Ngubani ozangijamela kabenza okumbi? Ngubani ozangenyela eengilamkhubeni na?”

¹⁷ Ngathana uSomnini akhange angisize, ngabe sengibalwa nabaleleko.

¹⁸ Nangidlumbana bonyana inyawo lami liyatjhelela, ukwethembeka kwakho, Somnini, kwangisekela.

¹⁹ Lokha imikhumbulwami nayihlubayezeka khulu, induduzwakho ivuselela umphefumulwami.

²⁰ Wena angeze waba nehlanganyelo nabagwebi abakhohlakeleko, labo ababumba okumbi ngokujamelana nomthetho.

²¹ Baluka ilisu ngepilo yolungileko, balahle onganacala ngesigwebo sokufa.

²² Kodwana uSomnini ube lirholo lami, iye, uZimami olidwala lobuphephelo bami.

²³ USomnini uzababuyiselela ngesono sabo, abathanyele ngobukhohlakali babo; iye, uSomnini uZimethu uzabathanyela.