AMARHUBO 92 - IsiNdebele 2012 Translation

Ukudumisa uZimu ngeSabatha

¹ Irhubo; ingoma yelanga leSabatha.

² Kuhle ukuthokoza uSomnini, iye, ukudumisa ibizo lakho, wena ongoPhezulu,

³ ukumemezela ukwethembeka kwakho ekuseni nobuqotho bakho ebusuku,

⁴ ngomkenenezo weharibha leenara ezilitjhumi nangomvumo weharibhana.

⁵ Ngambala, ungithokozisile ngomsebenzakho, Somnini, ngezenzo zezandla zakho ngizakuhlokoma.

⁶ Maye, zikulu izenzo zakho Somnini! Imicabangwakho uthi izikile na!

⁷ Isiyila angekhe sakwazi lokhu nesidlhadlha angeze sazwisisa:

⁸ Iinkhohlakali zihluma njengotjani neengilamkhuba ziyaqhakaza, kobana zibhujiswe isiphelani.

⁹ Wena Somnini, nini nanini uphakeme,

¹⁰ kodwana izitha zakho, Somnini, iye, izitha zakho, qala ziyabhubha; mbala, iingilamkhuba ziyahlakazwa.

¹¹ Wena uphakamise idumo lami njengephondo leliza, wangithambisa ngamanyephe amatjha.

¹² Amehlwami abonile ukuwa kwamanabami neendlebe zami zizwile ukubhubha kwabajamelani bami.

¹³ Abalungileko bahluma njengomdubi, bakhule njengomsedari weLibhanoni.

¹⁴ Bona batjalwe ngendlini kaSomnini, bahluma esirhodlweni sakaZimethu.

¹⁵ Nebudaleni babo basathela iinthelo, balihlaza begodu bahlala baqhakazile

¹⁶ ukuze batjengise bona uSomnini wethembekile. Yena ulidwala lami begodu akunabukhohlakali kuye.