AMARHUBO 91 - IsiNdebele 2012 Translation

UZimu uvikela omkhathalelako

¹ Umuntu ohlezi ekusithekeni kongoPhezulu nokhosele emthunzini woSabekako,

² uthi kuSomnini: “Ubuphephelo bami nerholo lami, uZimami engimethembako.”

³ Ngambala yena uyakuhlenga esifwini somthiyi, iye, kubhubhani orhayilako.

⁴ Ukufihla ngeensiba zakhe, ngaphasi kwamaphikwakhe ufunyana ubuphephelo, ubuqotho bakhe busihlangu nomthangala.

⁵ Angeze wesaba ukwesabeka kobusuku namkha imisubela ephapha emini,

⁶ nanyana ubhubhani ogega ebumnyameni, iye, umbulalazwe obhubhisa emini ekulu.

⁷ Ikulungwana ingawa eqadi kwakho, ngitjho netjhumi leenkulungwana ngesidleni sakho, kodwana ubhubhani angeze ehlela kuwe.

⁸ Uzamqala kwaphela ngamehlwakho, ubone ukubuyiselelwa kweenkhohlakali.

⁹ Ngambala wena Somnini usiphephelo sami! Nakube wenze ongoPhezulu isiphephelo sakho,

¹⁰ akunabumbi obuzakwehlela nemikhokha ezakutjhidela etendeni lakho.

¹¹ Mbala, uzakuyala iingilozi zakhe ngawe, zikulonde eendleleni zoke zakho;

¹² zikuthwale ngezandla zazo ukuze inyawo lakho lingakhutjwa lilitje.

¹³ Uzakubhadula phezu kwebhubezi nephiphi, ugadange ibhubezana nenyoka.

¹⁴ USomnini uthi: “Ongikhathalelako ngizamsindisa, ngimvikele ngombana wazi ibizo lami.

¹⁵ Lokha nangibizako ngizamphendula; ngibe naye eensizini, ngimhlenge bengimuphe idumo.

¹⁶ Ngizamsuthisa ngepilo ede, ngimbonise isindiswami.”