AMARHUBO 90 - IsiNdebele 2012 Translation

Umthandazo wokubawa isisa sakaZimu

¹ Umthandazo kaMosi, umuntu kaZimu. Somandla, wena ube siphephelo sethu iinzukulwana ngeenzukulwana!

² Wena bewunguZimu nini nanini, iintaba zingakabi khona, iye, ungakavezi iphasi nelizwe.

³ Ubuyisela obhubhako ethulini ngokuthi kwaphela: “Buyani nina bantu.”

⁴ Ngambala, emehlwenakho iminyaka eyikulungwana injengelanga linye, iye, ilanga layizolo elidlulileko; ifana nesikhathi sinye somlindo wobusuku.

⁵ Wena uqeda abantu, ekuseni baba njengobuthongo obudlulileko; babe njengotjani obuphelako:

⁶ Iye, ekuseni buyahluma, kodwana ntambama buphetha ngokutjhwaba, bubune.

⁷ Itukuthelwakho iyasiqothula, ubukhali bakho buyasethusa.

⁸ Wena ubeke amacalethu phambi kwakho, iye, okufihliweko phambi kwakho emkhanyweni.

⁹ Amalangethu ayaphela ngelaka lakho neminyakethu siyiphetha ngokububula.

¹⁰ Iminyaka yokuphila kwethu imatjhumi alikhomba, nasiqinileko ibe matjhumi abunane; kodwana ubuhle bayo bunobudisi nesizi. Mbala iminyakethu idlula masinyana bese thina siyaphapha semuke.

¹¹ Ngubani owazi amandla wetukuthelwakho, njengombana ilaka lakho lilikhulu, lifana nokwesabeka kwakho na?

¹² Somnini, sifundise ukubala amalangethu ukuze sizuze ihliziyo enokuhlakanipha.

¹³ Buya Somnini! Kuzabe kube nini na? Tlhuwela iinceku zakho.

¹⁴ Ekuseni yewusisuthise ngokwethembeka kwakho ukuze sithabe, sename emalangenethu woke.

¹⁵ Siphe amalanga wokujabula, abe ngangalawo owasibetha ngawo; iye, njengeminyakeni esabona ngayo okumbi.

¹⁶ Umsebenzakho awubonakale eencekwini zakho nephazimulwakho ebantwaneni bazo.

¹⁷ Somandla, Zimethu, kwanga isisa sakho singaba phezu kwethu! Nzinzisa umsebenzi wezandla zethu, iye, uqinise umsebenzi wezandla zethu.