AMARHUBO 9 - IsiNdebele 2012 Translation

Ukugweba kwakaZimu

¹ Kumkhaleli; ngeenodo zengoma ethi, “Ukufa kwendodana”; irhubo lakaDavida.

² USomnini ngizamdumisa ngehliziywami yoke. Somnini, ngizakukhuluma ngeemangaliso zakho zoke.

³ Ngizakwenama, ngisase kuwe; ngidumise ibizo lakho, Zimu ongoPhezulu.

⁴ Lokha izitha zami nazibalekako, ziyawa, zibhubhe phambi kwakho.

⁵ Iye, uvikele ilungelo lami nendabami uhlezi esihlalweni sobukhosi, wena mGwebi olungileko.

⁶ Ukhalimele izizwe; wabhubhisa iinkhohlakali; ibizo lazo ulisulile isiphelani.

⁷ Izitha uzitjhabalalisile, wasiphula amadorobhazo, sele ayiququ isiphelani; iye, ukukhunjulwa kwazo kuphelile. Zipheliswe njalo-ke zona

⁸ ngombana uSomnini ubusa isiphelani. Unzinzise nesihlalo sakhe sobukhosi bona agwebe.

⁹ Ngiyo obusa iphasi ngokulunga, igwebe abantu ngokufaneleko.

¹⁰ USomnini usiphephelo sabagandelelweko, iye, usiqongolo ngeenkhathi zokubandezelwa.

¹¹ Abalaziko ibizo lakho babeka ithemba labo kuwe ngombana abakufunako azange ubafulathele, Somnini.

¹² Rhubelani uSomnini ohlala eZiyoni, nimemezele izenzo zakhe ezizweni.

¹³ Obuyiselela iingazi, wabakhumbula abazwiswa ubuhlungu, azange akhohlwe isililo sabo.

¹⁴ Yiba nomusa kimi, Somnini! Yelela isizi lami engilibangelwe ngabangizondako! Nguwe ongihlenga emasangweni wokufa,

¹⁵ ukuze ngibabaze idumo lakho begodu ngijabule esindiswenakho emasangweni weZiyoni.

¹⁶ Bezizwe bawele ngemgodini abazembele wona, inyawo labo libanjwe esifwini abasithiyileko.

¹⁷ USomnini uzazisile, bewabeka isigwebo; iinkhohlakali zicutjhwe emsebenzini wezandla zazo. Higayoni

¹⁸ Inga iinkhohlakali zingaya endaweni yabafileko, iye, zoke izizwe ezikhohlwa uZimu.

¹⁹ Kodwana ngesikhathi soke odududu angakhohlweki, nethemba labachakileko lingafeleli nini nanini.

²⁰ Sikima Somnini, ungavumeli umuntu adlondlobale! Izizwe azigwetjwe phambi kwakho!

²¹ Faka ivalo kabezizwe, Somnini, ubenze bazi bonyana bangababhubhako!