AMARHUBO 89 - IsiNdebele 2012 Translation

UZimu ukhunjuzwa ngesivumelwano sakhe noDavida

¹ IMaskili laka-Etani umEzrarhi.

² Ngizakuvuma ngezenzo zokwethembeka kwakaSomnini nini nanini. Somnini, ngomlomami ngizakumemezela ubuqotho bakho iinzukulwana ngeenzukulwana.

³ Ngambala, ngizakumemezela ngithi: Ukwethembeka kwakho kunzinze isiphelani, uqinise ubuqotho bakho emazulwini.

⁴ Wena wathi: “Ngenze isivumelwano nokhethiweko wami, ngafunga encekwinami uDavida ngathi,

⁵ ‘Isizukulwana sakho ngizasiqinisa isiphelani, nginzinzise isihlalo sakho sobukhosi iinzukulwana ngeenzukulwana.’ ”

⁶ Iindalwa zezulu azidumise iimangaliso zakho, Somnini; iye, ubuqotho bakho ehlanganweni yabacwengileko

⁷ ngombana hlangana nabaphezulu ngubani ongalinganiswa noSomnini? Iye, ngubani ongafaniswa noSomnini phakathi kwabozinyana?

⁸ USomnini unguZimu osabekako ebandla labacwengileko; mkhulu uyababazeka kibo boke abamzombelezileko.

⁹ Somnini, Zimu Mninimandlawoke, ngubani onamandla njengawe? Somnini, ubuqotho bakho bukuzombelezile.

¹⁰ Wena ulawula ilwandle naliphakamako; uthulise amadlambalo nakhiphizelako.

¹¹ Wena wahlaba uRahabu bewamtshidlha; wahlakaza izitha zakho ngengalwakho enamandla.

¹² Amazulu angawakho nephasi ngelakho; wanzinzisa umhlaba nakho koke okukiwo.

¹³ Wena wadala itlhagu nesewula; iTabori neRherimoni ziyahlokoma ebizweni lakho.

¹⁴ Ingalwakho ineenkhwepha, isandla sakho sinamandla, isidla sakho siphakamile.

¹⁵ Ukulunga nobulungiswa kusisekelo sesihlalo sakho sobukhosi; ukwethembeka neqiniso kukhamba phambi kwakho.

¹⁶ Somnini, babusisiwe abantu abazi umkhosi womgidi, labo abakhamba emkhanyweni wobukhona bakho.

¹⁷ Ilanga loke bahlokoma ngebizo lakho begodu baphakamisa ukulunga kwakho.

¹⁸ Mbala, uyiphazimulo yamandlethu, ngomusakho idumo lethu liphakamile.

¹⁹ Umbusi osihlangu sethu, ungowakaSomnini, iye, ubabethu ungowoCwengileko ka-Israyeli.

²⁰ Kothembekileko wakho wakhe wakhuluma ngombono wathi: “Ngibeke isihlohlo phezu kwengorho, ngaphakamisa loyo okhethwe ebantwini.

²¹ Ngifumene incekwami uDavida, ngamzesa ngamafuthami acwengileko.

²² Isandla sami sizakuhlala simsekele begodu ingalwami izamqinisa.

²³ Akunasitha esizamhlula nesikhohlakali angeze samthobisa.

²⁴ Ngizakuqova amanabakhe phambi kwakhe, ngimadlhe phasi labo abamzondileko.

²⁵ Ubuqotho nokwethembeka kwami kuzakuba naye; ngebizo lami idumo lakhe lizakuphakanyiswa.

²⁶ Ngizakubeka isandla sakhe phezu kwelwandle nesidla sakhe phezu kwemilambo.

²⁷ Uzangibiza ngokuthi, ‘UnguBaba, unguZimami, nedwala lesindiswami.’

²⁸ Ngizamenza izibulo lami, iye, ongehla kwamakhosi wephasi.

²⁹ Ngizamgcinela ukwethembeka kwami isiphelani, isivumelwano sami naye sizakuhlala siqinile.

³⁰ Ngizakujamisa isizukulwana sakhe nini nanini, iye, nobukhosi bakhe, ije izulu lisekhona.

³¹ “Nakube abantwabakhe bahlubuka umthethwami begodu bangakhambi ngeemfundiso zami,

³² nalokha nabalulaza neemiso zami begodu bangagcini imiyalwami,

³³ ngizokuphobola ngentonga iimphambeko zabo namacalabo ngamatshwenyeko.

³⁴ Kodwana angekhe ngasusa ukwethembeka kwami kuye namkha ngiphambukise ubuqotho bami.

³⁵ Isivumelwano sami asobe ngasilulaza, namkha ngijikele ilizwi engilikhulumileko.

³⁶ Ngafunga kwaba kanye ngokucwengeka kwami, angeze ngamkhohlisa uDavida:

³⁷ Isizukulwana sakhe sizakujama nini nanini, isihlalo sakhe sinzinze phambi kwami njengelanga,

³⁸ sizakudzimelela isiphelani njengenyezi ebufakazi obuqinileko esibhakabhakeni.”

³⁹ Kodwana wena Zimu, kwanjesi umlahlile, wamala. Uvuthe ngelaka lakho kumzeswakho,

⁴⁰ wajikela isivumelwano sakho nencekwakho, wabhutjhabhutjha isihlohlo sayo ehlabathini.

⁴¹ Uphundluse yoke imithangalayo, wenza iimphephelo zayo zaba liququ.

⁴² Boke abadlula ngendlela bayayiphanga; seyiphenduke isiphoqo sabomakhelwana.

⁴³ Uphakamise isidla samanabayo, wenza zoke izitha zayo zathakasa

⁴⁴ begodu uphendulele ubukhali besabulayo, iye, epini akhange uyisekele.

⁴⁵ Ususe isithunzi sayo, waradlha phasi isihlalo sayo sobukhosi.

⁴⁶ Urhunyeze amalanga wobutjha bayo, wayithela ngeenhloni.

⁴⁷ Kuzabe kube nini Somnini uzifihla? Ilaka lakho livutha njengomlilo isiphelani na?

⁴⁸ Khumbula bona ukuphila kwami kungangani: Boke abantu owabadalako imihla yabo mifitjhani.

⁴⁹ Ngubani ongaphila angasaboni ukufa? Ngubani ongasinda emandleni wethuna na?

⁵⁰ Somandla, kuphi ukwethembeka kwakho kwakade owafunga ngakho ngobuqotho bakho kuDavida na?

⁵¹ Somandla, khumbula isiphoqo seenceku zakho engisethwele ngaphakathi kwami; khumbula zoke izizwekazi

⁵² eziphoqakwezi, iye, Somnini, izitha zakho eziphoqa amabhadu wozesiweko wakho.

⁵³ Akadunyiswe uSomnini nini nanini! Amen, iye, Amen.