AMARHUBO 88 - IsiNdebele 2012 Translation

Umthandazo wokusizwa

¹ Ingoma; irhubo lamaKhorarhi; kumkhaleli; ngeMarhalathi; ngokudlhegana; iMaskili; lakaHemani umEzrarhi.

² Somnini, Zimu wesindiswami, emini ngiyarhuwelela, ebusuku ngiphambi kwakho.

³ Umthandazwami awufike kuwe, indlebakho ilalele ukulila kwami

⁴ ngombana umphefumulwami uzwile ngamatshwenyeko nokuphila kwami kutjhidele ekufeni.

⁵ Ngibalwa kanye nabehlela emgodini, sese ngifana nomuntu ophelelwe mamandla,

⁶ otjhiyiweko hlangana nabafileko nanjengabamadlhwe bebalala ethuneni ongasabakhumbuliko; iye, njengabasusiweko esandleni sakho.

⁷ Ungibeke ekuzikeni komgodi, eendaweni zobumnyama obutjhingako.

⁸ Ilaka lakho lingehlele, ungibhibha ngamadlambakho.

⁹ Wenze iinhlobo zami zangitjhiya, wangenza ngaba sinyenyiso kizo; ngivalelekile, angikwazi ukuphuma.

¹⁰ Ilihlo lami liyafiphala ngesizi. Imihla yoke ngilila kuwe Somnini, ngikhongozela kuwe izandla zami.

¹¹ Abafileko uyabenzela iimangaliso na? Iinthunzi ziyavuka zikuthokoze na?

¹² Ukwethembeka kwakho kuyatjhunyayelwa ethuneni, namkha ubuqotho bakho endaweni yokubhujiswa na?

¹³ Iimangaliso zakho ziyaziwa ebumnyameni, namkha ukulunga kwakho ezweni lokukhohlwa na?

¹⁴ Yeke mina Somnini, ngilila kuwe; ekuseni umthandazwami wenyukela kuwe.

¹⁵ Somnini, ungilahlelani? Ungifihlelelani ubuso bakho?

¹⁶ Kusukela ebutjheni bami ngingochakileko, ngisengozini yokufa; ngiphelile ngokwethuswa nguwe.

¹⁷ Ubukhali bakho bungehlele; ukwesabeka kwakho kungiqedile.

¹⁸ Kungizombe njengamanzi imini yoke, kungizombeleze mahlangothi woke.

¹⁹ Wenze bona abangithandako nabomakhelwana bangihlubuke, iinhlobo zami sese kubumnyama.