AMARHUBO 86 - IsiNdebele 2012 Translation

Umthandazo wokusizwa

¹ Umthandazo kaDavida. Beka indlebakho Somnini, ungiphendule ngombana ngisichaka begodu ngiswele.

² Londa ipilwami ngombana ngingothembekileko. Wena unguZimami, sindisa incekwakho ekwethembako.

³ Ngirhawukele Somandla ngombana ilanga loke ngilila kuwe.

⁴ Thabisa umphefumulo wencekwakho ngombana ngilangazelela wena, Somandla.

⁵ Mbala, wena Somandla ulungile begodu uyacolela, ukwethembeka kwakho kukhulu kibo boke abalila kuwe.

⁶ Somnini, lalela umthandazwami, ubeke indlebe esililweni sesibawo sami.

⁷ Ngelanga lesizi lami ngilila kuwe ngombana uyangiphendula.

⁸ Kibo boke abozinyana akakho onjengawe Somandla nemisebenzi enjengeyakho ayikho.

⁹ Zoke izizwe ozenzileko Somnini, zizakuza ziguqe phambi kwakho, zidumise ibizo lakho

¹⁰ ngombana wena umkhulu begodu wenza iimangaliso. Wena wedwa unguZimu.

¹¹ Ngifundise indlelakho Somnini, ukuze ngikhambe eqinisweni lakho; ngiphe ihliziyo epheleleko ukuze ngesabe ibizo lakho.

¹² Somandla, Zimami, ngikuthokoza ngehliziywami yoke, ngidumisa ibizo lakho nini nanini

¹³ ngombana ukwethembeka kwakho kukhulu kimi: Watjhaphulula umphefumulwami emgodini wokufa.

¹⁴ Zimu, iindeleli zingivukele, ijima leendlova lizumana nepilwami begodu wena azikubeki ndawo.

¹⁵ Kodwana wena Somandla, unguZimu onomusa nesirhawu, ubuthaka ekusilingekeni, uzele ukwethembeka neqiniso.

¹⁶ Phendukela kimi ungirhawukele! Qinisa incekwakho ngamandlakho, usindise indodana yencekukazakho.

¹⁷ Ngibonise iphawu lesisa sakho ukuze abangizondako badane nababona wena Somnini ungisiza, ungiduduza.