AMARHUBO 85 - IsiNdebele 2012 Translation

Ukubuyisana noZimu

¹ Kumkhaleli; irhubo lamaKhorarhi.

² Somnini, wabonisa umusa enarhenakho, wabuyisa itjhudu lakaJakopo.

³ Wacolela amacala wabantu bakho, wasibekela zoke izono zabo.

⁴ Wasusa yoke itukuthelwakho, waphenduka ekuvutheni kwelaka lakho.

⁵ Nje-ke, Zimu wesindiswethu, buyela kithi godu, bamba ukusilingeka kwakho phezu kwethu.

⁶ Uzasithukuthelela isiphelani na? Kghani, uzakwelula ilaka lakho kizo zoke iinzukulwana na?

⁷ Wena awuzukusivuselela godu ukuze abantu bakho bathabe kuwe na?

⁸ Sitjengise ukwethembeka kwakho, Somnini, usiphe isindiswakho.

⁹ Ngifuna ukuzwa lokho uZimu uSomnini azakutjho ngombana uzakukhuluma ukuthula ebantwini, iye, kwabathembekileko bakhe. Bangabuyeli ebudlhayeleni!

¹⁰ Ngambala isindiswakhe iseduze kwabamesabako: Iphazimulwakhe izakuhlala enarhenethu,

¹¹ ukwethembeka neqiniso kuhlangabezane, ukulunga nokuthula kwangane.

¹² Kuzakuhluma iqiniso ehlabathini, ukulunga komkayi kwengamele iphasi.

¹³ Godu uSomnini uzasipha okuhle, inarhethu ithele iinthelo zayo.

¹⁴ Ukulunga kuzakukhamba phambi kwakhe, kwenzele iinyawo zakhe umzila.