AMARHUBO 84 - IsiNdebele 2012 Translation

Ithabo lokulotjha ngethempelini

¹ Kumkhaleli; livunywa ngeenodo zeGathi; lamaKhorarhi; irhubo.

² Maye iyathandeka indlwakho, Somnini, Mninimandlawoke!

³ Umphefumulwami uyalangazelela, iye, ufisa ukuba sesirhodlweni sakaSomnini; ihliziywami nomzimbami ululukela uZimu ophilako.

⁴ Zimami, Somnini, ngitjho nemirwibili ifunyene ikhaya ema-aldarinakho. Kosami, Mninimandlawoke, nekonjani ifunyene indlwanayo lapha ibeka khona amadzinyanayo.

⁵ Babusisiwe abahlala endlinakho ngombana bakudumisa nini nanini.

⁶ Babusisiwe abantu amandlabo akuwe, iye, labo abanhliziyo zinomendo weZiyoni.

⁷ Lokha nabadabula umrhoba wemithi yebhalisamu, bawenza waba siyalu nezulu lokuthoma lawusibekela ngitjho nangamachibi.

⁸ Baragela phambili ngamandla ekhambeni labo ngombana bazakuvela phambi kwakaZimu eZiyoni.

⁹ Somnini, Zimu Mninimandlawoke, yizwa umthandazwami, beka indlebe Zimu kaJakopo.

¹⁰ Zimu, yelela umvikelethu, uqale ubuso bomzeswakho.

¹¹ Kwamambala, ilanga ngesirhodlweni sakho lihle kunamalanga ayikulungwana kenye indawo. Kungcono ngibe sembunjwaneni wendlu kaZimami, kunokuhlala ematendeni weenkhohlakali

¹² ngombana uSomnini uZimu ulilanga nesihlangu; iye, upha umusa nokuhlonipheka. Ayikho into ehle ayigodlako kilabo abakhamba ngobuqotho.

¹³ Somnini, Mninimandlawoke, ubusisiwe umuntu othembela kuwe!