AMARHUBO 83 - IsiNdebele 2012 Translation

Umthandazo wokobana kubhujiswe izitha zaka-Israyeli

¹ Ingoma; irhubo laka-Asafa.

² Zimu, ungathuli, ungali ukukhuluma. Nyakaza Zimu!

³ Qala, izitha zakho ziyavungama, abakuzondileko baphakamisa iinhloko.

⁴ Ngabantu bakho balumba amano, bakha isicathana ngalabo obavikeleko.

⁵ Bathi: “Izani sibaqedeni ukuze bangasabi sisizwe; ibizo laka-Israyeli lingasakhunjulwa.”

⁶ Ngahliziyonye balumbisana amano, benza isivumelwano ngani:

⁷ Labo-ke matende ka-Edomu nama-Itjhimayeli, bakwaMowabi namaHagari,

⁸ wakaGebali, ama-Amoni nama-Amalekhi, iFilistiya kanye nabahlali beTirosi.

⁹ Ne-Asiriya lizihlanganise nabo, laba yingalo yeenzukulwana zakaLothi.

¹⁰ Yenza kibo njengeMidiyaneni nanjengakuSisera noJabini emlanjaneni weKhitjhoni:

¹¹ Bona ababhubhela e-Eni-Dori, baba msuqwa ehlabathini.

¹² Yenza eenkhulwini zabo njengaku-Orebi noZebi, wenze emakhosanenabo njengakuZebarhi noTsalimuna,

¹³ okungibo ebebathi: “Asizithathele amadlelo kaZimu, abe lilifa lethu.”

¹⁴ Zimami, benze babe njengekhula elomileko, iye, njengamawunguwungu emuka nommoya.

¹⁵ Njengomlilo otjhisa ihlathi nanjengelangabi elithungelela iintaba,

¹⁶ ngendlela leyo bagijimise, ubarage ngesivunguvungu sakho, ubethuse ngesiwuruwuru sakho.

¹⁷ Thela ubuso babo ngeenhloni ukuze bakwazi ukufuna ibizo lakho, Somnini.

¹⁸ Benze barhubutjheke bebadane nini nanini; bakhene bebabhubhe.

¹⁹ Benze balemuke bona wena, nguwe wedwa obizwa bona unguSomnini, iye, wena ungoPhezulu ephasini loke.