AMARHUBO 81 - IsiNdebele 2012 Translation

UZimu uzimisele ukuhlenga u-Israyeli godu

¹ Kumkhaleli; livunywa ngeenodo zeGathi; irhubo laka-Asafa.

² Hlokomelani uZimu omamandlethu ngokujabula, rhuwelelani uZimu kaJakopo.

³ Vumani ingoma, nililise abosotjherere, nibethe iharibha elihle kanye nelincani.

⁴ Vuthelani ipalapala ekuthwaseni kwenyanga, iye, nalokha inyanga ihlangene ngelanga lomnyanyethu.

⁵ Lokho kusimiso ku-Israyeli, kumyalo kaZimu kaJakopo.

⁶ UZimu wenza isimemezelo kuJosefa lokha narhwanta ngokujamelana neGibhide. Ngezwa ilimi ebengingalazi lithi:

⁷ “Ngaphumuza ihlombe lakhe emthwalweni, ngasusa isandla sakhe esiqwebini.”

⁸ USomnini wathi: “Israyeli, lokha nawusesizini, wangibiza ngakuhlenga. Ngakuphendula ngisebumnyameni besiwuruwuru. ngakuzizinya emanzini weMeriba.

⁹ Yizwani bantu bami, lokha nanginibonisako. Israyeli, kwanga ungangilalela!

¹⁰ Akungabikhona uzinyana phakathi kwakho, ungakhothameli usingazimu.

¹¹ Mina Somnini nginguZimakho owakwenyula enarheni yeGibhide. Khamisa umlomakho, ngizawuzalisa.”

¹² Nje-ke uSomnini wathi: “Abantu bami akhange balalele ilizwi lami, u-Israyeli azange anginake.

¹³ Ngalokho ngabaliselela ekanini yehliziywabo kobana bakhambe ngokubona kwabo!

¹⁴ Kwanga abantu bami bangangizwa, inga u-Israyeli angakhamba eendleleni zami.

¹⁵ Nje-ke bengizakuthobisa masinyana izitha zabo, isandla sami sihlanakele amanababo.

¹⁶ Abazonde uSomnini bebazakutjhotjhobana phambi kwakhe, kube sisabelo sabo sanini nanini.

¹⁷ USomnini bekazakupha ikoroyi ehle. Iye, mina Somnini bengizakusuthisa ngeenyosi zemadwaleni.”