AMARHUBO 80 - IsiNdebele 2012 Translation

Umthandazo wokubuyiswa kwaka-Israyeli

¹ Kumkhaleli; ngeTjhotjhanimu; ubufakazi; irhubo laka-Asafa.

² Yewusizwe melusi ka-Israyeli, wena orhola uJosefa njengomhlambi! Wena ohlala phezu kwamakerubhi, ziveze ngephazimulo

³ phambi kwaka-Efrayimi, uBhenjamini noManase. Vuselela amandlakho, uze uzosisindisa.

⁴ Zimu, sibuyise! Khanyisa ubuso bakho, khona sizakusindiswa.

⁵ Somnini, Zimu Mninimandlawoke, kuzabe kube nini unevunda ngemithandazo yabantu bakho na?

⁶ Wabondla ngesikwa seenyembezi, wabaseza isiziba seenyembezi.

⁷ Wasenza isihlekiso sabomakhelwana bethu nezitha zethu ziyasikokomeja.

⁸ Zimu ongoPhezulu, sibuyise! Khanyisa ubuso bakho, khona sizakusindiswa.

⁹ Wakhupha isidiribe eGibhide, waqotjha izizwe wasitjala.

¹⁰ Wasilungisela indawaso, senabisa imirabhaso, sazala inarha.

¹¹ Iintaba zembeswa mthunzaso nemisedari emikhulu mirarelaso;

¹² sanabululela iingala zaso elwandle, amahlumelaso afika emilanjeni iYufrathe.

¹³ Kubayini wephule iimbiyelo zaso, kuthi okudlulako kukhe koke na?

¹⁴ Iwotji yehlathi iyasitlhifirija neenkhakhabi zommango ziyadla.

¹⁵ Awu, wena Zimu ongoPhezulu, yewubuyele kithi godu; usezulwini qala phasi ubone, unake isidiribesi,

¹⁶ iye, ilungu owalitjala ngesidla sakho.

¹⁷ Basitjhise ngomlilo isidiribeso, basiquntile basiwisela phasi. Kwanga bangabhubha ngokukhalima kobukhona bakho.

¹⁸ Kodwana isandla sakho Somnini, asibe phezu kwaloyo ongesidleni sakho, iye, phezu kwaloyo ozikhulisele yena.

¹⁹ Yeke, angeze sisaba ngabangathembekiko kuwe, sivuselele, khona sizakubabaza ibizo lakho.

²⁰ Somnini, Zimu ongoPhezulu, sibuyise! Khanyisa ubuso bakho, khona sizakusindiswa.