AMARHUBO 8 - IsiNdebele 2012 Translation

UZimu udunyiswa ngendalwakhe

¹ Kumkhaleli; livunywa ngeenodo zeGathi; irhubo lakaDavida.

² Kosethu, Somandla, maye likhulu kangangani idumo lakho ephasini loke! Ubukhosi bakho bubatjazwa ukufikela emazulwini!

³ Ngemilomo yabantwana namasana wendlale iinsekelo zesivikelo ngokujamelana namanabakho; iye, ngokususa izitha nabazibuyiselelako.

⁴ Nangiqala isibhakabhaka sakho okumsebenzi weminwakho inyezi neenkwekwezi, ozinameke eendaweni zazo,

⁵ ngithi uyini-ke obhubhako bona ungabe umtjheje, ubayini umuntu wephasinapha bona ungambeka abe mphathi na?

⁶ Mbala umenze waba ngaphasana kweendalwa zezulu wamthwesa ukuhlonitjhwa nobukhosi!

⁷ Wamenza waba mphathi womsebenzi wezandla zakho; wabeka koke ngaphasi kweenyawo zakhe:

⁸ zoke izimvu neembuzi kanye neenkomo, ngitjho neembandana zommango,

⁹ iinyoni zesibhakabhaka neenhlambi zelwandle ezivundla ngemizila yamalwandle.

¹⁰ Kosethu, Somandla, maye likhulu kangangani idumo lakho ephasini loke!