AMARHUBO 79 - IsiNdebele 2012 Translation

Ukuthandazela isizo

¹ Irhubo laka-Asafa. Awu Zimu, izizwe ziza elifeni lakho, zisilaphaze ithempeli lakho elicwengileko, zenze iJerusalema yaba marubhi.

² Zanikela iindumbu zeenceku zakho kobana zibe kukudla kweenyoni zomkayi, iye, inyama yabathembekileko bakho eembandaneni zommango.

³ Zathulula iingazi zabo njengamanzi eJerusalema yoke, kwangabakhona obembelako.

⁴ Sibe siphoqo sabomakhelwana bethu, isithuko nesinyefulo kilabo abasiphahlileko.

⁵ Somnini, kuzabe kube nini? Uzakuthukuthela isiphelani na? Isikhwele sakho sizakuvutha njengomlilo na?

⁶ Thela ilaka lakho phezu kwabezizwe abangakwaziko naphezu kwemibuso engabizi ibizo lakho

⁷ ngombana sebamdlile uJakopo bebarhayila nendawakhe yokuhlala.

⁸ Ungasibeki amacala wekadeni, masinyana yehlisela umusakho kithi ngombana sehliswe khulu.

⁹ Sisize, wena Zimu wesindiswethu, ngebanga ledumo lebizo lakho; sisindise, bewusithethelele izono zethu, ngenca yebizo lakho.

¹⁰ Kubayini bezizwe kufuze bathi: “Uphi uZimabo loyo na?” Yenza bona izizwe zazi ukubuyiselelwa kweengazi zeenceku zakho ezathululwako begodu nathi usibonise lokho.

¹¹ Ukububula kweembotjhwa akufike phambi kwakho; ngamandla wengalwakho, tjhaphulula labo esele benganyelwe kukufa.

¹² Somandla, buyiselela esifubeni sabomakhelwana bethu isiphoqo abakuphoqe ngaso, iye, sibuyelelwe kalikhomba!

¹³ Thina sibabantu bakho, iye, umhlambi wedlelo lakho. Nje-ke, sizakuthokoza isiphelani, sikhulume ngedumo lakho iinzukulwana ngeenzukulwana.