AMARHUBO 78 - IsiNdebele 2012 Translation

Ukuyeleliswa kwaka-Israyeli ngezenzo zaboyise

¹ IMaskili laka-Asafa. Bantu bekhethu, lalelani ukufundisa kwami, nibeke iindlebe zenu emezwini womlomami.

² Ngizakuvula umlomami ngomfanekiso, ngiphuphume iimfihlakalo zekadeni.

³ Izinto esizizwileko nesizaziko, esatjelwa zona bobamkhulu,

⁴ angeze sazifihla eenzukulwaneni zabo; sizokutjela nesizukulwana esizako ngemikarisomraro kaSomnini namandlakhe, kanye neemangaliso azenzileko.

⁵ Wajamisa ubufakazi kwaJakopo, wabeka umthetho kwa-Israyeli ayala ngawo abobamkhulu kobana bawufundise abantwababo,

⁶ ukuze isizukulwana esilandelako siwazi, iye, abantwana abasazakubelethwa. Nabo basikime, batjele abantwababo

⁷ kobana babeke ithemba labo kuZimu. Kumele bangakhohlwa imisebenzi kaZimu, kodwana balonde imiyalwakhe.

⁸ Bangabi njengaboyisemkhulu ebekusizukulwana esikhunyaleleko nesihlubukako; iye, isizukulwana ebesinehliziyo enganaqiniso nebesinommoya ongakathembeki kuZimu.

⁹ Bakwa-Efrayimu bebahlome ngemisubi nemisubela, nokho bahlehla ngelanga lepi.

¹⁰ Akhange balonde isivumelwano sakaZimu begodu bala ukwenza njengokweemfundiso zakhe.

¹¹ Iye, bakhohlwa lokho akwenzileko neemangaliso ababonisa zona.

¹² Wenza iimangaliso phambi kwaboyisemkhulu enarheni yeGibhide, emmangweni weTsowana.

¹³ Wahlukanisa ilwandle, wabeyamisa, wajamisa amanzi aba njengedonga.

¹⁴ Emini wabarhola ngelifu, ebusuku ngomkhanyo womlilo.

¹⁵ Waqhekeza amadwala erhalawumbeni, wabaseza amanzi inga abuya esizibeni esikhulu.

¹⁶ Wathumbula iinkhukhula edwaleni, wagelezisa amanzi ehla njengemilambo.

¹⁷ Nanyana kunjalo, bathuwelela ngokona kuye, bahlubuka ongoPhezulu ebhudwini.

¹⁸ Bazizinya uZimu eenhliziyweni zabo ngokubawa ukudla ngokukhaluza.

¹⁹ Bakhuluma kumbi ngoZimu, bathi: “UZimu angalungisa isithebe erhalawumbeni na?

²⁰ Wabetha idwala, kwaphuma amanzi nemilanjana yagobhoza. Kghani, angapha abantu bakhe ukudla, abalungisele inyama na?”

²¹ Lokha uSomnini nezwa lokho, wabila khulu, waphuphuma, wavutha umlilo ngoJakopo, ilaka lakhe larubha ngo-Israyeli

²² ngombana akhange bakholwe kuZimu begodu azange bathembe amandla wesindiswakhe.

²³ Nje-ke wayala umkayi phezulu, wavula iminyango yezulwini,

²⁴ wanisa imana phezu kwabo bona badle, wabapha amabele wezulwini.

²⁵ Abantu badla isikwa seengilozi, wabathumela umphako omnengi.

²⁶ Wavunguzisa ummoya wepumalanga ukusuka phezulu, ngamandlakhe waphephethisa ummoya wangesewula.

²⁷ Wabehlisela inyama yaba yinengi njengethuli, iinyoni eziphapha njengetjhwabatjhwaba yelwandle.

²⁸ Wazenza zidoyele ekabeni yekampakhe, iye, ethaberinakelini lakhe zombelele.

²⁹ Badla bebasutha sentwala! Wabapha ebebakukhanukela.

³⁰ Kodwana bathi basakhanuka inyama, iye, isesemlonyenabo njalo,

³¹ ubukhali bakaZimu babavukela. Wabulala abazimukileko phakathi kwabo, wadula phasi amasokana wakwa-Israyeli.

³² Ngaphezu kwakho koke lokho baragela phambili nokona; akhange bazethembe iimangaliso zakhe.

³³ Yeke, waphelisa amalangabo njengomphefumulo neminyakabo ekwesabeni.

³⁴ Lokha nasele ababulalako, bamfuna, baphenduka bafunisisa uZimu.

³⁵ Bakhumbula bona uZimu ulidwala labo, uZimu ongoPhezulu umhlengabo.

³⁶ Kodwana bamkhohlisa ngemilomabo, baleya kuye amala ngamalimabo.

³⁷ Ihliziywabo akhange ibe neqiniso kuye bebangakathembeki esivumelwaneni sakhe.

³⁸ Phezu kwalokho yena waba nomusa, wacolela ubumenemene babo; iye, akhange ababhubhise, wazibamba kanengi elakeni lakhe, azange aveze boke ubukhali bakhe.

³⁹ Wakhumbula ukuthi bayinyama nje, bamumoya odlulako nongasabuyiko godu.

⁴⁰ Kwaba kanengi kangangani bamhlubuka erhalawumbeni, iye, bamdanisa enarheni elibhudu.

⁴¹ Bazizinya uZimu kanenginengi, barhuga ongoCwengileko wakwa-Israyeli.

⁴² Akhange bakhumbule amandlakhe emalangeni abasindisa ngawo esitheni,

⁴³ lokha enza iimbonakaliso zakhe eGibhide neemangaliso endaweni yeTsowana:

⁴⁴ Waphendula imilanjana yeNayili iingazi, azange bakwazi ukusela emilanjenabo.

⁴⁵ Wabathumela ngeembawu ezabadlako neenrhwarhwa ezabhubhisako.

⁴⁶ Wanikelela iintjalo zabo ngentethe, iinthelo zomsebenzabo ngesikhonyani.

⁴⁷ Warhayila iindiribe zabo ngesinanja namakhiwani wommango ngesikhukhula.

⁴⁸ Waphobolisa iinkomo zabo ngesinanja nemihlambabo ngombani womphezulu.

⁴⁹ Wehlisela phakathi kwabo ilaka lakhe elivuthako: ubukhali, itukuthelo namatshwenyeko; iye, iwoma leenthunywa ezibhubhisako.

⁵⁰ Wavula indlela yelaka lakhe, akhange abababalele bona bangafi, kodwana wanikelela ipilwabo ngezifo.

⁵¹ Warhayila woke amazibulo eGibhide, iye, isithelo sokuthoma sobudoda ematendeni kaRhamu.

⁵² Nje-ke wakhupha abantu bakhe njengezimvu, wabarhola erhalawumbeni njengomhlambi.

⁵³ Wabelusa ngokuthula ukuze bangesabi ngombana ilwandle labhibha izitha zabo.

⁵⁴ Wabaletha emkhawulwenakhe ocwengileko, enarheni yeentaba ethunjwe sisidla sakhe.

⁵⁵ Waqotjha izizwe phambi kwabo; wabahlukanisela inarhazo njengelifa labo, wanzinzisa iinkoro zakwa-Israyeli eendaweni zazo.

⁵⁶ Nanyana kunjalo bazizinya uZimu ongoPhezulu; bamhlubuka ngokungalondi iimiso zakhe.

⁵⁷ Baba nokungathembeki, bahlehla sinyava njengaboyisemkhulu. Bahluleka njengomsebe ongazisiko.

⁵⁸ Bamtlhorholoja ngeendunduma zabo, bamnyenyisa ngeenthombe-mbazwa zabo.

⁵⁹ Lokha uZimu nabona lokho, wabila khulu waphuphuma, walahla u-Israyeli ngokupheleleko.

⁶⁰ Watjhiya indawakhe ngeTjhilo ekulitende ahlala kilo hlangana nabantu.

⁶¹ Wanikela amandlakhe ekuthunjweni, iye, igugu lakhe esandleni sesitha.

⁶² Wanikelela abantu bakhe esabuleni, wabila khulu ngelifa lakhe.

⁶³ Amasokanabo adliwa mlilo, iintombi zabo azange zivunyelwe irhalani.

⁶⁴ Abaphristi babo bawa ngesabula; abahlolokazi babo akhange balile.

⁶⁵ Nje-ke uSomandla wavuka inga uvuka ebuthongweni, njengengorho ebeyihlulwe liwayini,

⁶⁶ wahlula izitha zakhe ngokuzidedisa, wazithela ngeenhloni ezingapheliko.

⁶⁷ Walahla itende lakaJosefa, akhange akhethe ikoro ka-Efrayimu.

⁶⁸ Kodwana wakhetha ikoro yakwaJuda nentaba yeZiyoni ayithandako.

⁶⁹ Wakha indawakhe ecwengileko yaphakama nanjengephasi wayijamisela iinsekelo isiphelani.

⁷⁰ Wakhetha uDavida incekwakhe, wamsusa eembayeni zezimvu.

⁷¹ Ekweluseni izimvukazi ezimunyisako, wamthatha bona eluse abantu bakhe uJakopo nelifa lakhe u-Israyeli.

⁷² Wabelusa ngehliziyo eqotho, wabarhola ngekghono lesandla sakhe.