AMARHUBO 77 - IsiNdebele 2012 Translation

Isililo sokululukela uZimu

¹ Kumkhaleli; ngeenodo zengoma ethi, “Jeduthuni”; laka-Asafa; irhubo.

² Ngilila kuZimu, ngiyarhuwelela; iye, ngilila kuZimu kobana angizwe.

³ Elangeni lesizi lami ngifuna uSomnini, ebusuku izandla zami zeluliwe, azidinwa; umphefumulwami wala ukududuzwa.

⁴ Ngiyabubula nangikhumbula wena Zimu, ngiyazindla nommoyami udambe.

⁵ Ungenza ngiphilelwe, iye, ngikhathazekile namezwi anginawo

⁶ lokha nangicabanga amalanga wakade neminyaka eyadlulako.

⁷ Ebusuku ngikhumbula iinodo zami; ngibubule ngehliziywami bengiwurubajeke, ummoyami uguduze, ngizibuze:

⁸ USomandla ulahlela safuthi, angasabi nomusa godu na?

⁹ Ukwethembeka kwakhe sekuphelile na? Ilizwi lakhe selikhawukile iinzukulwana ngeenzukulwana na?

¹⁰ Ingabe uZimu ukhohlwe ukuba nesirhawu, namkha ngelaka lakhe ususa isisa sakhe na?

¹¹ Yeke ngafika esiphethweni sokuthi: Imbangela yenceba lami kukobana isidla songoPhezulu siphendukile!

¹² Kodwana ngizahlala ngikhumbula izenzo zakaSomnini. Mbala ngikhumbule iimangaliso zakho zekadeni,

¹³ ngihumuze ngemisebenzakho yoke, ngizindle ngezenzo zakho zamandla.

¹⁴ Zimu, indlelakho icwengile! Ngimuphi uzinyana omkhulu njengoZimu?

¹⁵ Wena unguZimu owenza iimangaliso, ubonakalise amandlakho phakathi kwabantu.

¹⁶ Ngengalwakho wahlenga abantu bakho, iye, iinzukulwana zakaJakopo noJosefa.

¹⁷ Lokha amanzi abona wena Zimu, iye, lokha nakubonako, ayayaluka; ngitjho namanzi amanengi ayanyakaza.

¹⁸ Amafu athulula amanzi, umphezulu wararamba, kwabenya imibanakho phasi phezulu.

¹⁹ Ukuthuthumba kwakho kwaba njengetjhada levili lekarana; imibanakho yaphazima enarheni yoke, iphasi lanyakaza belazamazama.

²⁰ Indlelakho beyidabula elwandle, iye, imizilakho isemanzini anamandla, nokho amagadangwakho bekangabonakali.

²¹ Warhola abantu bakho njengezimvu, iye, ngesandla sakaMosi no-Aroni.