AMARHUBO 76 - IsiNdebele 2012 Translation

UZimu wakwa-Israyeli umugwebi wephasi loke

¹ Kumkhaleli; ngesililiso seenara; irhubo laka-Asafa; ingoma.

² KwaJuda uZimu uyaziwa, ibizo lakhe likhulu kwa-Israyeli.

³ Umtlhatlhanakhe wanzinziswa eSalema, iye, indawakhe yokuhlala eseZiyoni.

⁴ Lapho wephula imisubela ebenyezelako, isihlangu, isabula neenkhali zepi.

⁵ Wena Ziyoni, uyaphazimula, udarhe udlula iintaba ezikuzumako.

⁶ Iingorho zemukwe ipangwazo, zisacwile phakathi ebuthongweni; woke amabutho abanjwe izandla.

⁷ Ngokukhalima kwakho, Zimu kaJakopo, kukhungatheka umkhweli nenjomani.

⁸ Somnini, mbala wena uyesabeka! Ngubani ongajama phambi kwakho lokha nasele ubhoke ngelaka lakho na?

⁹ Lokha nawukhupha isigwebo sakho usezulwini, iphasi lethuka lathula du.

¹⁰ Iye, uZimu wasikima kobana agwebe, asindise boke abagandelelweko benarha.

¹¹ Ngambala, iRhamathi-Aramu izakudumisa, iye, inengi leRhamathi lizakuphephela kuwe.

¹² Yenzani iinthembiso kuSomnini uZimenu begodu niziphethe. Akuthi zoke izizwe zombelele, zilethe iimbiko koSabekako;

¹³ yena othobisa amakhosana, nowenza amakhosi wephasi athuthumele.