AMARHUBO 74 - IsiNdebele 2012 Translation

Umthandazo ngemva kokugirizwa kwethempeli

¹ IMaskili laka-Asafa. Awu Zimu, usilahleleni isiphelani na? Kubayini ilaka lakho livuthe phezu komhlambakho?

² Khumbula ibandla lakho owalizuza ekadeni, ikoro yelifa lakho owayihlengako nentaba yeZiyoni ohlala kiyo.

³ Yewize emarubhini wesiphelani; endaweni ecwengileko isitha sone yoke into.

⁴ Amanabakho arore ekabeni yehlanganwakho, ajamisa amatshwaywawo khonapho.

⁵ Njengabaphakamisa iinlembe ukuze bakghedlhe ihlathi eliminyeneko,

⁶ amanaba eza njalo ngamazembe nemigqala, aphohloza nya umsebenzayo obaziweko.

⁷ Okhele indawakho ecwengileko ngomlilo, ayitjhisa ngokuyidula phasi; asilaphaza indawo lapha kuhlala ibizo lakho.

⁸ Adlumbana athi: “Asiqedeni koke!” Nje-ke atjhisa zoke iindawo zemihlangano kaZimu enarheni.

⁹ Amatshwaywethu asiwaboni; njengombana kungekho umphorofidi akakho kithi owaziko bona kuzabe kube nini kunjalo.

¹⁰ Zimu, umjamelani uzasiphoqa bekube nini? Isitha sizakuhlambalaza ibizo lakho isiphelani na?

¹¹ Kubayini ugodla isandla sakho? Rhotjha isidla sakho usiqede!

¹² Zimu, kwakade wena uyiKosami, wenza imisebenzi yokusindisa phakathi kwenarha.

¹³ Nguwe owaphehla ilwandle ngamandlakho, waphohloza iinhloko zeembandana ezikulu zemanzini.

¹⁴ Iye, nguwe owaphihliza iinhloko zakanomrhaso welwandle, wamenza bona abe kukudla kweendalwa zerhalawumba.

¹⁵ Nguwe owabhoboza imithombo nemilanjana, godu nguwe owomisa imilambo ehlala igeleza.

¹⁶ Ngeyakho imini, godu nobusuku ngebakho; nguwe owabeka inyezi nelanga.

¹⁷ Nguwe owajamisa yoke imikhawulo yephasi, iye, nguwe owenza ihlobo nobusika.

¹⁸ Khumbula lokhu, Zimu: Izitha ziphoqe wena, Somnini neendlhayela zihlambalaze ibizo lakho.

¹⁹ Unganikeli izuba lakho eembandaneni; iye, ipilo yabeyame kuwe, ungayikhohlwa nini nanini.

²⁰ Khumbula isivumelwano ngombana iindawo ezimnyama enarheni, zigcwele ubudlova.

²¹ Ungajikisi ogandelelweko adanile! Yenza isichaka nodududu badumise ibizo lakho.

²² Sikima Zimu, jamela indabakho; khumbula, iindlhayela ziyakuphoqa imihla yoke.

²³ Ungakhohlwa itjhada lamanabakho, iye, umkhosi wabajamelani bakho, ohlala ukukholile.