AMARHUBO 73 - IsiNdebele 2012 Translation

Ukulahleka nokubuya endleleni yakaZimu

¹ Irhubo laka-Asafa. Ngambala uZimu umlungele u-Israyeli, iye, labo abanehliziyo ehlanzekileko.

² Kodwana nakungimi yena, iinyawo zami zapheze zatjhelela, kwasala kancani bona ziphambuke

³ ngombana ngakhanukela abazikhukhumezako, nangibona itjhudu labakhohlakeleko.

⁴ Bona abananhlungu bekube sekufeni, izisu zabo zihlala zitatamele.

⁵ Abatjhabatjheki njengabantukazana, abahlunguphazwa njengabanye.

⁶ Yeke ukuzigqaja kungunongoro entanyenabo, bambethe ubudlova njengengubo.

⁷ Amehlwabo abimbekile ngokunona, imicabango yehliziywabo iyaphuphuma.

⁸ Bayaphoqa bakhulume ngokukhohlakala, ngokuziphakamisa bagandelela abanye.

⁹ Imilomabo inyefula izulu namalimabo ahlambalaza iphasi.

¹⁰ Iwoma liyabalandela, lirhuqa amezwabo inga mamanzi,

¹¹ lokha nabathi: “UZimu wazi njani na? OngoPhezulu unelwazi na?”

¹² Qalani, zinjalo-ke iinkhohlakali: Zihlala zikhomba ngophakathi, zikhule ngomnono.

¹³ Kube lilize kobana ngihlambulule ihliziywami, ngahlamba izandla zami ngimsulwa

¹⁴ ngombana ngakhathazwa ilanga loke, njalo ekuseni ngahlunguphazwa.

¹⁵ Nakube bengithe, “Ngizakuhlala ngikhuluma njalo”, bengizokuba mkhohlisi esigungwini sabantwabakho.

¹⁶ Kodwana ngathi nangilinga ukuzwisisa lokhu, kwabonakala kuyinto ebudisi kimi,

¹⁷ bekwaba kulapha ngingena khona ngethempelini lakho Zimu, lokha nangilemuka isiphetho sabo:

¹⁸ Mbala ubeka iinkhohlakali eendaweni ezibutjhelelezi, uzenze bona ziwele ebhudwini.

¹⁹ Maye, zibhujiswa ngesikhatjhana! Zitjhabalaliswa nya ngevalo!

²⁰ Zinjengebhudango elimbi ekuphaphameni komuntu: Somandla, lokha nawuvukako uzithalalisa njengombono webhudangwelo.

²¹ Lokha ihliziywami imunyu nemizwami idungekile,

²² mina ngaba siyila nongalemukiko; iye, ngaba njengesibandana kuwe.

²³ Nokho mina bengiseze nginawe; ubambe isandla sami sokudla.

²⁴ Ungirhola ngeseluleko sakho, ungamukele ebukhoneni bakho.

²⁵ Ngubani enginaye ezulwini ngaphandle kwakho na? Ngaphandle kwakho ephasini akunanto engiyikhanukelako.

²⁶ Umzimbami nehliziywami zingaphelelwa, kodwana uZimu ulidwala lehliziywami nesabelo sami ngokungapheliko.

²⁷ Mbala, abadeda kuwe bazakubhubha; uphelisa boke abangakathembeki kuwe.

²⁸ Kodwana nakungimi, kuhle ukuba seduze noZimu; ngenze uSomnini uSomandla isiphephelo sami ukuze ngikhulume ngakho koke akwenzileko.