AMARHUBO 72 - IsiNdebele 2012 Translation

Umthandazo wokusekela umbusi

¹ Irhubo lakaSolomoni. Zimu, yipha umbusi imithethwakho nokulunga kwakho kozesiweko.

² Kwanga angagweba abantu bakho ngokulunga, iye, abeyame kuwe ngokufaneleko.

³ Kwanga iintaba zingakhiqiza ukuthula ebantwini nemibundu ithele ukulunga.

⁴ Kwanga angajamela indaba yabazeyame ngawe; iye, asindise abachakileko; kodwana aphohloze ogandelelako.

⁵ Inga kungathi kusakhanya nenyanga isadarhile, abantu bakho bakwesabe, iye, iinzukulwana ngeenzukulwana.

⁶ Inga umbusi angafana nezulu eliwulukela etjanini obusikiweko nanjengomfefezwana othambisa iphasi.

⁷ Kwanga emihlenakhe kunganda ukulunga, kuvame ukuthula, inyanga ingasabikhona.

⁸ Kwanga angabusa ukusuka elwandle ukuya kelinye, kusukela emlanjeni omkhulu ukuya epelazwe;

⁹ abahlali berhalawumbeni bakhothame phambi kwakhe, izitha zakhe zikhothe ithuli.

¹⁰ Kwanga amakhosi weTharatjhitjhi neweligwini angaletha kuye umthelo; amakhosi weTjheba neSeba amlethele izipho;

¹¹ iye, woke amakhosi aguqe phambi kwakhe; zoke izizwe zizinikele kuye.

¹² Yena wenyela abadududu nabalilako, iye, abakhwahlileko nabanganabani.

¹³ Ukhathalela ababuthakathaka nabadududu; asindise nabatlhogako.

¹⁴ Ekugandelelweni nenturhwini uyabahlenga, ipilwabo iligugu emehlwenakhe.

¹⁵ Kwanga angasiphilela! Inga angaphiwa igolide leTjheba, athandazelwe njalonjalo, ahlale abusisekile ilanga loke.

¹⁶ Inga kungabakhona inala enarheni, ngitjho neenqongweni zeentaba, iinthelo zakhona ziyathazele njengemithi yeLibhanoni, abantu emadorobheni baphalaze njengotjani emmangweni.

¹⁷ Kwanga ibizo lakhe lingahlala mlibe, idumo lakhe lijame ije kusakhanya; kwanga zoke izizwe zingakhanukela ukubusiswa njengaye, zimbize bonyana ungobusisekileko.

¹⁸ Akadunyiswe uSomnini uZimu, iye, uZimu ka-Israyeli, okunguye yedwa owenza iimangaliso.

¹⁹ Alidunyiswe isiphelani ibizo lakhe eliphazimulako; kwanga iphazimulwakhe ingazala iphasi loke. Amen, iye, Amen.

²⁰ Ukuphela kwemithandazo kaDavida indodana kaJese.