AMARHUBO 71 - IsiNdebele 2012 Translation

Ukubawa isizo kuZimu esikhathini sokuluphala

¹ Kuwe Somnini, ngiyaphephela, yeke ungavumi ngingene ehlazweni.

² Ngokulunga kwakho ngenyule, ungihlenge, beka indlebakho kimi, ungisindise.

³ Yiba lidwala kimi, irharha lokuphephela ngesikhathi soke. Uyaleze bonyana ngisinde! Mbala, ulidwala nerholo lami!

⁴ Zimami, ngisindise esandleni seenkhohlakali, iye, ekubanjweni ngabangakalungi nabagandeleli

⁵ ngombana ulithemba lami, Somnini, Somandla. Kwebutjheni bami ngithembele kuwe;

⁶ ngizesame kuwe kwekubelethweni kwami. Nguwe owaqunta inongo nangibelethwako. Ukudumisa kwami kukuwe soke isikhathi.

⁷ Ngibe sibonelo kabanengi ngombana wena usiphephelo sami esiqinileko.

⁸ Umlomami uzele idumo nokukubabaza ilanga loke.

⁹ Ungangilahli esikhathini sokuluphala, ungangitjhiyi lokha amandlami naphelako

¹⁰ ngombana izitha zami zikhuluma ngami nalabo abeluse ipilwami bazwana ngami,

¹¹ bathi: “UZimu umtjhiyile! Mlandeleni, nimbambe ngombana akanamenyeli!”

¹² Zimu, ungabi kude nami! Zimami, rhaba ungisize!

¹³ Abajamelene nami abakhene bebapheliswe, abangisongelako bembeswe ihlamba nehlazo.

¹⁴ Mina ngizakuhlala ngethemba, ngirhagala ekukudumiseni.

¹⁵ Umlomami uzakukhuluma ngokulunga kwakho nesindiswakho ilanga loke ngombana angibazi ubukghwari bokutlola.

¹⁶ Ngize kobana ngikhulume godu ngezenzo zakho ezikulu, Somnini, Somandla, iye, isindiso eyenziwe nguwe wedwa.

¹⁷ Kwasebutjheni bami Zimu, ungifundisile; nanje, ngisamemezela iimangaliso zakho.

¹⁸ Njengombana sengimdala ngithukghele, ungangitjhiyi Zimu bengikhulume ngamandlakho eenzukulwaneni, okutjho ubungorho bakho kibo boke abazakubelethwa.

¹⁹ Mbala, ukulunga kwakho Zimu, kufika emazulwini aphakamileko. Kukhulu okwenzileko Zimu! Ngubani onjengawe na?

²⁰ Wena ungibonise iinsizi ezinengi kanye neenhlekelele. Yeke vuselela ipilwami godu, ubuye ungenyule ekuzikeni kwethuna.

²¹ Dlondlobalisa idumo lami, ujike ungitjhiriye.

²² Mina-ke ngizakudumisa ngeharibha; iye, ngidumise iqiniso lakho, Zimami, ngikukhalelele ngeharibhana, wena ongocwengileko wakwa-Israyeli.

²³ Lokha nangikhalela iindumiso kuwe, iimbhena zami zizakuhlokoma, ngokunjalo nomphefumulwami owuhlengileko.

²⁴ Iye, nelimu lami lizakuhumuza ngokulunga kwakho imini yoke ngombana labo abangisongeleko babekwe ekukheneni nehlazweni.