AMARHUBO 7 - IsiNdebele 2012 Translation

Ukubawa uSomnini bonyana avikele ozunywako

¹ ITjhigayoni kaDavida ayirhubela uSomnini ngenca yamezwi kaKutjhe umBhenjamini.

² Somnini Zimami, ngiphephela kuwe, ngisindise kwabangizumako ungihlenge,

³ bangangidabudabuli njengebhubezi, bangitlebhule iinquqwana, kungekho ongilamulelako.

⁴ Somnini, Zimami, kukhona okumbi engikwenzileko na? Kunokungakalungi ezandleni zami?

⁵ Ngenze ubumbi kengikhambisana naye na? Ngidlelezele umjamelanami ngaphandle kwesizathu?

⁶ Nakunjalo, vumela isitha sami sizumane nami besingifumane, sigandelele ipilwami phasi, iye, sigadangele isithunzi sami ethulini.

⁷ Sikima ngelaka lakho Somnini! Phakama ujamelane nokuvutha kwabajamelani bami! Yeqa Zimu ungenyele! Uyale bona kube nesigwebo,

⁸ nje-ke vumela umhlangano wezizwe ukuphahle, buyela esikhundleni sakho esiphakamileko wengamele.

⁹ Iye, uSomnini nguye ogweba abantu. Nje-ke Somnini, yewungigwebe ngokulunga kwami nangokuya ngobuqotho obukimi.

¹⁰ Inga kungapheliswa ubumbi beenkhohlakali! Somnini, inga ungaqinisa abalungileko! Mbala, ohlola iinhliziyo neziso nguZimu olungileko.

¹¹ Isihlangu sami sikuZimu osindisa abaqotho ngehliziyo.

¹² UZimu ungumgwebi olungileko, uhlala aphambene nokumbi imihla yoke.

¹³ Ngambala uzakubuya godu, alole isabulakhe, acuphe umsebe wakhe kobana ulunge.

¹⁴ Ulungise iinhlabano zakhe zokubulala, wenza imisubelakhe ibe masungulo avuthako.

¹⁵ Lokha umuntu namitha okumbi, akhulelwe umonakalo, uzakubeletha ikohliso.

¹⁶ Iye, owemba umgodi wesifu, akhuphe ihlabathawo, uzakuwela ngaphakathi komlindi awenzileko lowo.

¹⁷ Umonakalwakhe uzakubuyela phezu kwehlokwakhe, ubudlova bakhe behlele ekhakhayini lakhe.

¹⁸ USomnini ngizamthokoza ngokulunga kwakhe, ngizakuvuma ngidumise ibizo lakaSomnini ongoPhezulu.