AMARHUBO 69 - IsiNdebele 2012 Translation

Ukuphila ngethemba ebunzimeni

¹ Kumkhaleli; ngeenodo zengoma ethi, “amaKhwa”; irhubo lakaDavida.

² Zimu, ngisindise ngombana sengivele ngehloko ngemanzini!

³ Ngiminza edakeni elitjhingako, sengifike emanzini azikileko neenkhukhula ziyangigubuzesa.

⁴ Ngidiniwe ngokulila kwami, umphimbami uyarhoroza, amehlwami selafiphele ngokuqalelela uZimami.

⁵ Abangizonda ngelize banengi ukudlula iinhluthu ehlokwenami. Abangiqedako banamandla, iye, labo abajamelana nami ngamanga. Ngikatelelwa ukubuyisela engingakakudlelezeli.

⁶ Zimu, wena uyabazi ubudlhayela bami, amacalami abhamba kuwe.

⁷ Somnini, Somandla, Mninimandlawoke, abaqalelela kuwe, abangadaniswa ngenca yami. Zimu ka-Israyeli, abakufunako abangarhubutjhwa ngebanga lami.

⁸ Ngenca yakho ngithwele ihlamba, ihlazo lembese ubuso bami.

⁹ Sengiphenduke otjhili ngakwethu, ngimqhamuka ebantwaneni bakababa.

¹⁰ Ukutjhisakalela indlwakho kungidlile; iinhlamba zabakuthukako zehlele kimi:

¹¹ Ngazithobisa ngokuzila, kwaba yihlamba kimi.

¹² Ngembatha izambatho zokuzila nalapho ngaba siphoqo kibo.

¹³ Abahlezi esangweni bathamba ngami neengomeni zeendakwa kunjalo.

¹⁴ Kodwana mina, ngithandaza kuwe, Somnini, akube sikhathi sokwamukeleka kuwe, Zimu: Ngiphendule ngokwethembeka kwakho okukhulu! Ngeqiniso lesindiswakho

¹⁵ ngikhuphe edakeni! Angifuni ukutjhinga phasi; ngifisa ukwenyulwa kabangizondako, ngitjho nekuzikeni kwamanzi.

¹⁶ Ungavumeli isikhukhula singigubuzese, ungavumeli ukuzika kungiginye namkha umgodi wethuna ungibhibhe.

¹⁷ Ngiphendule Somnini ngombana ukwethembeka kwakho kukhulu; phendukela kimi ngesirhawu sakho esikhulu,

¹⁸ ungayifihleli incekwakho ubuso bakho ngombana ngihluphekile. Rhaba ungiphendule!

¹⁹ Tjhidela kimi, ungihlenge, ngitjhaphulule ngenca yezitha zami.

²⁰ Wena uyayazi ihlamba engethukwa ngayo, ihlazo nokurhubutjhwa kwami; zoke izitha zami ziyazeka kuwe.

²¹ Iinhlamba ziyephulile ihliziywami, ayiselapheki. Ngalindela ukutlhuwelwa, kodwana do nokurhawukelwa, kodwana akhange ngikufunyane.

²² Banginikela inyongo esikhundleni sokudla nangomileko bangiseza isibharha.

²³ Itafula labo alibe sisifu phambi kwabo, libe sithiyo ebakhozini babo.

²⁴ Amehlwabo akaphophale ukuze bangaboni; wenze amadinabo ahlale agedla.

²⁵ Thululela ilaka lakho phezu kwabo, ubukhali bakho obuvuthako bubafikele.

²⁶ Kwanga ikampabo ingaba dududu kungabikhona ohlala ematendenabo

²⁷ ngombana bazumana nalabo obabethileko, bakhuluma ngalabo obalimazileko.

²⁸ Ngezelela icala ecaleni labo, ungababali emsenakho.

²⁹ Abasulwe encwadini yabaphilako, bangatlolwa erhelweni labalungileko.

³⁰ Ngihluphekile, ngineenhlungu; yeke isindiswakho ayingivikele!

³¹ Ibizo lakaZimu ngilidumisa ngengoma, iye, ngimphakamisa ngokuthokoza!

³² Lokhu kuzamthabisa uSomnini ukudlula umhlabelo wekomo, iye, ikunzi eneempondo neenqatha ezihlukene kabili.

³³ Abathobekileko bayabona, bajabule, abafuna uZimu bayathaba. Nje-ke iinhliziyo zenu azename!

³⁴ Ngambala, uZimu uyabalalela abanesidingo, akabadeleli abangabakhe abasekuthunjweni.

³⁵ Akadunyiswe lizulu nephasi, ilwandle nakho koke okuphila kilo.

³⁶ Ngambala uZimu uzakusindisa iZiyoni, avuselele amadorobho wakwaJuda. Abangabakhe bazakuhlala lapho bawathumbe;

³⁷ iye, iinzukulwana zeenceku zakhe zizakuzuza inarha, abathanda ibizo lakhe bazakuhlala kiyo.