AMARHUBO 68 - IsiNdebele 2012 Translation

Amandla kaZimu ethempelini

¹ Kumkhaleli; irhubo lakaDavida; ingoma.

² UZimu uzakusikima, izitha zakhe zisabalale; abamzondako babaleke phambi kwakhe.

³ Zimu, baqotjhe njengentuthu nayiphephethwako. Mbala, njengokuncithika kwamanyephe ahlanu komlilo, ngokunjalo iinkhohlakali zizakubhubha phambi kwakaZimu.

⁴ Kodwana abalungileko bazakuthaba basase phambi kwakaZimu; bathakase ngokujabula.

⁵ Rhubelani uZimu, nidumise ibizo lakhe, hlokomani kiloyo okhwele amafu; ibizo lakhe nguSomnini, nililizele phambi kwakhe.

⁶ Unguyise weentandani nomjameli wabahlolokazi, unguZimu ohlezi endawenakhe ecwengileko.

⁷ UZimu upha abadududu ikhaya, arholele iimbotjhwa ekuthakaseni, kodwana abahlubukileko bahlala ebhudwini.

⁸ Zimu, nawuphuma ipi phambi kwabantu bakho, iye, lokha nawukhamba erhalawumbeni leJetjhimoni,

⁹ iphasi lahlengezela. Amazulu anisa izulu phambi kwakaZimu, onguZimu weSinayi, iye, phambi kwakaZimu, uZimu wakwa-Israyeli.

¹⁰ Zimu, wawululela izulu phezu kwelifa lakho.

¹¹ Umhlambakho wanzinza kilo, ngokulunga kwakho Zimu, walilungiselela labo abadududu.

¹² USomandla ukhupha umyalo; abafazi abanengi bamemezela iindaba,

¹³ bathi: “Amakhosi ayabaleka! Amabuthwawo nawo ayabaleka!

¹⁴ Ngitjho nani eniseembayeni nifumana amaphiko wezuba atshidzwe ngesiliva, iye, iinsiba zakhona zinegolide elidarhileko!”

¹⁵ Lokha oSabekako nahlakaza amakhosi enarheni, igabhogo likhithikela ngeTsalimoni.

¹⁶ Wena ntaba enamandla, ntaba yeBhatjhani, iye, neenqongo zentaba yeBhatjhani,

¹⁷ ngitjho nina ntaba ezineenqongo ezinengi, kubayini ninomona naniqala intaba uZimu ayikhethe kobana ahlale kiyo na? USomnini uzakuhlala lapho isiphelani!

¹⁸ Ngeenkarana ezinamandla, eziziinkulungwana ngeenkulungwana, iye, iinkulungwana ebuphaziphazini, uSomandla uvele eSinayi ngokucwenga.

¹⁹ Ngemva kobana uthumbe abathunjwa, wathatha izipho ebantwini, ngitjho nakilabo abahlubukileko, wakhuphukela ekuphakameni, kobana uhlale lapho, wena Somnini, Zimu.

²⁰ Akudunyiswe uSomnini, osisingatha imihla ngemihla, iye, uZimu oyisindiswethu.

²¹ Mbala, uZimethu unguZimu wesindiso; ukuphepha ukufa, kukuSomnini uSomandla.

²² UZimu uzakuphahlaza iinhloko zezitha zakhe, iye, ifokotho eneenhluthu yalabo abaphikelela ekoneni.

²³ USomandla wathi: “Ngizabehlisa eBatjhani, ngibenyuse ekuzikeni kwelwandle,

²⁴ ukuze nihlanze iinyawo zenu eengazini, namalimu wezinja zenu afunyane isabelo ezitheni.”

²⁵ Zimu, iinqhema zakho ziyabonakala, nazingena endaweni ecwengileko, iye, iinqhema zakho Zimami, Kosami.

²⁶ Ngaphambili kukhamba abavumi, phakathi kube matlawu aphethe abosotjherere, ngemva kube ngababetha iinara,

²⁷ bavuma bathi: “Dumisani uZimu emihlanganweni emikhulu; nidumise uSomnini emthonjeni ka-Israyeli.”

²⁸ Ngemva kwabo uBhenjamini ongomncani, urhola phambili; ulandelwa liviyo leenkhulu zakwaJuda neenkhulu zakwaZebuloni kanye nezakwaNafitali.

²⁹ Zimu, bonakalisa amandlakho, iye, amandla owasikhombisa wona, Zimu,

³⁰ usethempelini lakho ngehla kweJerusalema. Amakhosi kumele alethe iimbiko kuwe.

³¹ Khalimela isibandana emhlangeni, okuziinkunzikazi ezibhodlela abantu, inga bamathole. Gadangela labo abathanda isiliva; uhlakaze abantu abakarekela ipi.

³² Akuze abazenda abasuka eGibhide, amaKutjhe akarhabe alethe izipho kuZimu.

³³ Nina mibuso yephasi, rhubelani uZimu, nidumise uSomandla,

³⁴ iye, yena okhwele amafu emkayini wakade. Qalani, uzwakalisa ilizwi lakhe, iye, ilizwi elinamandla.

³⁵ Yamukelani amandla kaZimu, yena obukhosi bakhe buphezu kwaka-Israyeli namandlakhe asemafini.

³⁶ UZimu uyesabeka endawenakhe ecwengileko, unguZimu wakwa-Israyeli; upha abantu bakhe amandla nesibindi. Akadunyiswe uZimu!