AMARHUBO 67 - IsiNdebele 2012 Translation

Isifiso sokubusiswa nguZimu

¹ Kumkhaleli; ngesililiso seenara; irhubo; ingoma.

² Kwanga uZimu angaba nomusa kithi, asibusise, asikhanyisele.

³ Kwanga indlelakho ingaziwa ephasini nesindiswakho kibo boke bezizwe.

⁴ Kwanga izizwe zingakudumisa Zimu, iye, boke abantu abadumise wena.

⁵ Izizwe azithakase, zihlokome ngombana awukhethi ubuso ekugwebeni nezizwe uyazihlahla ephasini.

⁶ Kwanga izizwe zingakudumisa Zimu, iye, boke abantu abadumise wena.

⁷ Ihlabathi ithelile iinthelo zayo; uZimu, iye uZimethu usibusisile.

⁸ Kwanga uZimu angasibusisa njalonjalo; ukuze imikhawulo yoke yephasi imesabe.