AMARHUBO 66 - IsiNdebele 2012 Translation

Ukuthokoza uZimu ngesizo lakhe

¹ Kumkhaleli; ingoma; irhubo. Hlokomani kuZimu, noke nina bantu bephasi!

² Dumisani ukuhlonipheka kwebizo lakhe, nibabaze idumo lakhe!

³ Yenithi kuZimu: “Imisebenzakho iyesabeka ngebanga lamandlakho amakhulu, izitha zakho zizakutjhotjhobana phambi kwakho.

⁴ Loke iphasi lizakukhothama kuwe, lidumise wena, iye, lidumise ibizo lakho.”

⁵ Yizani nizokubona izenzo zakaZimu, kuyesabeka ukwenza kwakhe phakathi kwabantu:

⁶ Uphendule ilwandle walenza ihlabathi eyomileko, abantu beyama umlambo ngeenyawo. Nje-ke asithakaseni kuye,

⁷ kuye obusa ngeenkhwepha isiphelani, onamehlo ahlala eluse izizwe. Ngalokho abakhunyaleleko abangaziphakamisi.

⁸ Babazani uZimethu nina zizwe, akuzwakaliswe ilizwi lobukhulu bakhe,

⁹ yena osilonde hlangana nabaphilako, akhange avume bona iinyawo zethu zitjhelele.

¹⁰ Mbala wena Zimu, usizizinyile; wasihlola njengesiliva nalihlungwako.

¹¹ Wasingenisa esifwini, wasithwesa iinhlupheko.

¹² Wavumela abantu bakhwela phezu kweenhloko zethu; sakhamba emlilweni nemanzini, kodwana wena wasikhuphela ebukhosini.

¹³ Ngizakungena ethempelini lakho nemihlabelo yokutjhiswa, ngizalise kuwe iimfungo zami,

¹⁴ iye, iimfungo engiziphimise ngeembhena zami; ekuhluphekeni ngathembisa ngomlomami ngathi:

¹⁵ “Ngizakunikela kuwe imihlabelo yokutjhiswa yezimvu ezinonisiweko kanye nomnuko wemihlabelo yamaqama; godu ngizakunikela ngeenkunzi nangeempongo.”

¹⁶ Yenize nizokulalela noke nina enesaba uZimu, ngizonibikela lokho angenzele khona:

¹⁷ Kuye ngalila ngomlomami indumiso iselimini lami.

¹⁸ Ngathana bengisophe okumbi ehliziyweni, uSomandla ubangeze angizwa.

¹⁹ Kodwana mbala uZimu ungizwile, wabeka indlebe emezwini womthandazwami.

²⁰ UZimu akadunyiswe ngombana akhange awale umthandazwami, namkha asuse ukwethembeka kwakhe kimi.