AMARHUBO 65 - IsiNdebele 2012 Translation

UZimu uyabonelela

¹ Kumkhaleli; irhubo lakaDavida; ingoma.

² Zimu, nguwe ofanele ukudunyiswa eZiyoni! Kuwe kufuze kuzaliswe iimfungo,

³ iye, kuwe ozwa imithandazo. Abantu boke beza kuwe

⁴ neendaba zamacalabo. Lokha iimphambeko zethu nazisidizibezako, nguwe osithethelelako.

⁵ Ubusisiwe omenyulako wena, omtjhideza kobana ahlale eenrhodlweni zakho. Sanelisekile ngobuhle bendlwakho, iye, ngokucwengeka kwethempeli lakho.

⁶ Usiphendule ngokulunga nangezinto ezethusako, wena Zimu wesindiswethu! Ulithemba lemikhawulo yoke yephasi nelamajukujuku welwandle.

⁷ Ngamandlakho wanzinzisa iintaba, wena uvunule amandla,

⁸ uthulisa ukurhuba kwamalwandle, ukuhlokoma kwamagagasawo netjhada lezizwe.

⁹ Labo abahlala epelazwe bayathuthumela ngeembonakaliso zakho; wena ubangela ukumangala, ukusuka epumalanga ukuya etjingalanga.

¹⁰ Uthekela iphasi bewulithelelele, ulivundisa khulu; mbala, isiziba sakaZimu sizele amanzi, abantu ubabonelela ngamabele, iye, ngendlela leyo uyababonelela:

¹¹ Uzalisa imisele yamasimu ngamanzi, ulalisa amasoyawo; uyithambisa ngomvimbi, ubusise iintjalo zakhona.

¹² Uhlobisa umnyaka ngobuhle bakho, lapha ukhambe khona kuncithika umnono.

¹³ Amadlelo werhalawumba ayaphuphuma, imibundu izivunulise ukuthakasa.

¹⁴ Imirhula izembathise imihlambi; imirhoba izisibekele ngamabele, iyavuma, ihlabe umkhosi wokwesasa.