AMARHUBO 62 - IsiNdebele 2012 Translation

UZimu usiphephelo sethu kwabambi

¹ Kumkhaleli; kuJedutuni; irhubo lakaDavida.

² Umphefumulwami uzithulele kuZimu kwaphela; isindiswami ivela kuye.

³ Nguye yedwa olidwala nesindiswami, iye, isiphephelo sami, angeze ngasikinywa linengi.

⁴ Kuzabe kube nini nidumela umuntu kobana nimhlanganyele nimbulale, khisibe unjengeboda eliwako nomthangala obhurukako?

⁵ Baneqhinga lokumketula esihlalweni sakhe esiphakemeko benamela ikohliso: ngemilomabo bayabusisa, kodwana ngeenhliziyo bayathuwelelisa.

⁶ Mphefumulwami, ziphumulele kuZimu kwaphela ngombana ithemba lami livela kuye.

⁷ Nguye yedwa olidwala nesindiswami, iye, isiphephelo sami, angeze nganyakaziswa.

⁸ KukuZimu ukusindiswa nokwaziwa kwami; idwala lobuphephelo nerholo lami nguZimu.

⁹ Thembelani kuye ngeenkhathi zoke nina bantu, thululani iinhliziyo zenu phambi kwakhe; uZimu usiphephelo sethu.

¹⁰ Abantukazana bamumoya nje, abantu abaziinkhulu bayikohliso; esilinganisweni bayakhuphuka, boke balula kunommoya.

¹¹ Ningabeki ithemba ekudlelezeleni, ningabi nethemba elililize lobugebengu. Nanyana umnotho wanda, ningabeki ihliziywenu kiwo.

¹² UZimu ukhulume kanye, ngezwa kabili: Amandla angawakaZimu.

¹³ Kukuwe ukwethembeka, Somandla ngombana uvuza umuntu ngokwemisebenzakhe.