AMARHUBO 61 - IsiNdebele 2012 Translation

Ukuhlulukela ukuba sethempelini

¹ Kumkhaleli; ngesililiso seenara; irhubo lakaDavida.

² Zimu, yizwa umkhosi wesililo sami, ulalele umthandazwami.

³ Ngilila kuwe ngisepelazwe, lokha ummoyami nawuphasi. Ngirholele edwaleni eliphakemeko kunami

⁴ ngombana kimi bewusoloko usiphephelo, umbhotjhongo oqinileko kude nezitha.

⁵ Ngifisa ukuhlala etendeni lakho nini nanini, ngikhosele ngekhwapheni lamaphikwakho.

⁶ Mbala, wena Zimu uzwile iimfungo zami, waphetha isibawo salabo abesaba ibizo lakho.

⁷ Yeleka ubude bepilo yekosethu, welulele iminyakayo eenzukulwaneni ezinengi.

⁸ Kwanga ingahlala esihlalweni sobukhosi phambi kwakaZimu nini nanini. Thumela ukwethembeka neqiniso, kobana kuyilonde.

⁹ Ngalokho ngizakudumisa ibizo lakho ngesikhathi soke, lokha nangizalisa iimfungo zami imihla ngemihla.