AMARHUBO 60 - IsiNdebele 2012 Translation

UZimu ulisizo lethu

¹ Kumkhaleli; ngeenodo zengoma ethi, “iLikhwa lobuFakazi”; iMikitamu; irhubo lakaDavida ekufundiseni,

² lokha nalwa nama-Aramu weMesopotamiya nama-Aramu weTsoba nalokha uJowabi nabuya ekubhubhiseni iinkulungwana ezilitjhumi nambili zama-Edomu ngemrhobeni weTswayi.

³ Zimu, usilahlile! Wasibhavumulela ngokufutheka! Nje-ke sivuselela!

⁴ Wenze inarha yadengezela, wayidabula. Lungisa iphadlhuka ngombana inarha ihlephukile.

⁵ Uthwalise abantu bakho nzima, wasipha iwayini elisitherezelisako.

⁶ Kilabo abakwesabako uphakamise iphawu, ukuze babuthanele kilo kude nemisebe.

⁷ Sindisa ngesidla sakho, ukuze abathandekako kuwe batjhaphuluke. Siphendule!

⁸ UZimu uthembisile endawenakhe ecwengileko wathi: “Ngokuthakasa ngizohlukanisa iTjhekemu, ngilinganise umrhoba weSukothi.

⁹ Ngeyami iGiliyadi, ngeyami iManase! I-Efrayimu iyingwanami, iJuda iyintongami yobukhosi.

¹⁰ IMowabi isisitja sami sokuhlambela; phezu kwe-Edomu ngiphosa ipatlagwana lami; ngikuhlokomela ngokwenama wena Filistiya!”

¹¹ Ngubani ozangisa edorobheni elinemithangala? Ngubani ozangihlahla angise kwa-Edomu na?

¹² Angitjho nguwe Zimu osilahlileko, wangasaphumi ipi namabuthwethu?

¹³ Akhese usincede esitheni ngombana isizo lomuntu lililize.

¹⁴ NgoZimu sizakuba nesibindi, uZimu ngokwakhe uzazigadangela phasi izitha zethu.